Pop-up Stores ta yuda hopi esnan cu ta cumpra flor na ultimo minuut

ORANJESTAD (AAN): Algo cu sigur cada biaha a bira mas notable, ta e bendemento di regalo banda di caminda.

   E tipo di ‘Pop-up Stores’ aki kizas pueblo lo bay mira den futuro bira cada biaha mas como algo normal.  Principalmente considerando e hecho cu tin hopi hende cu simplemente no gusta di baha di nan auto, drenta un negoshi pa haci compras.  Por observa cu tin varios persona cu ta prefera di para banda di caminda, y cumpra un rosa of un regalo chikito, vap-vap.  Hasta riba Diadomingo cu ta Dia di Mama por a mira nan habri.

   DIARIO a compronde, cu tin algun comerciante, cu no ta mucho contento cu esaki. Pasobra nan como comerciante tin di cumpli cu tur sorto di ley, pago di aseguro, pago di grondbelasting, etc., pa nan por opera nan negoshi.  Mientras cu un Pop-up Store ta djis yega segun temporada, y despues cera bek.

   Aunke e ley di bida ta bisa, cu pa yuda bo mes, pa Dios yudabo.  Aunke despues cu bo caba di cumpra un rosa, nan ta bisabo cu alegria: “Felis Dia di Mama pa tur e mamanan na Aruba”.