ORANJESTAD (AAN): Ministerio di Asuntonan Economico, Comunicacion y Desaroyo Sostenibel hunto cu e Aruba Circular Economy Foundation ("ACEF") a firma un memorandum of understanding (MOU) durante un ceremonia virtual.
E enfoke di ACEF lo ta aumenta e conciencia riba e tema di economia circular pa asina acelera e transicion pa un modelo economico sostenibel, independiente y inclusivo pa Aruba.
ACEF ta un fundacion non-profit y ta consisti di miembronan local y internacional cu experticio diverso y experiencia trahando riba e temanan di sostenibilidad y economia circular. E focus di e fundacion ta pa crea conciencia (awareness), promove conocemento di economia circular, y stimula "circular thinking and practice" - pues pensamento y practica (estilo di bida) circular - na Aruba.
Minister Geoffrey Wever ta contento di por inicia e partnership aki hunto cu ACEF. Cu e colaboracion lo por sigura miho esfuerso den inspira, motiva y empodera ciudadano di Aruba y tambe negoshinan local pa haci e transicion den un ritmo mas rapido. E parti di "public awareness" ta importante pa e ministerio su implementacion di "Circular Economy Action Plan" cual oficialmente lo ser lansa fin di e luna aki.
Firmamento di e MOU ta sirbi como un prome paso concreto den e direccion di un partnership colaborativo duradero entre Gobierno di Aruba y ACEF pa asina cuminsa implementa e "Circular Economy Action Plan". Ambos organisacion y gobierno ta kere firmemente den e oportunidadnan cu e economia circular ta representa pa e desaroyo di Aruba, y ta comprometi den stimula e transicion mas pronto posibel.
Durante e reunion tabata tey presente pa firma Mr. Geoffrey Wever (Minister di Asuntonan Economico, Comunicacion y Desaroyo Sostenibel) y Mr. Egidio Bundel (Presidente di ACEF), acompaña pa Mr. Bauke Feenstra (Treasurer ACEF), Mrs. Eunice Semeleer (Sustainability Policy and Strategy Advisor) and Mr. Jeremy Croes (Circular Economy Project Lead).
