ORANJESTAD (AAN): Diahuebs merdia, Formador tabatin un serie di reunion atrobe cu varios stakeholder, y e biaha aki a papia cu esnan cu ta bin di e veld di enseñanza.
Formador a reuni tambe cu Ernesto Rozenstand, kende ta presidente di Fundacion SVOA bao di cual e.o. Colegio Arubano ta cay.
Rozenstand a bisa cu nan a trece 9 punto dilanti na Formador y e partner di coalicion. El a splica cu SVOA a pone hopi enfasis riba e curiculo, e fluho entre un scol basico pa scol di Ciclo Basico, y tambe e doorstroom entre MAVO pa un HAVO.
Fuera di esey, Rozenstand a mustra cu como cu Gobierno ta esun cu ta stipula maneho pa cu Enseñanza, nan a propone Formador pa den e programa di Gobierno, pone cu dado momento tin di escoge te unda ta laga Papiamento ta un materia principal na scol.
SVOA ta opina cu tin di stipula un “maximo schooljaar” unda ta stop di duna Papiamento, y despues pasa pa haya les na Hulandes.
Na Colegio Arubano, bo ta keda haya Papiamento te cu Havo-3. Despues bo ta pasa over pa Hulandes.
Segun Rozenstand, e motibo pa esaki ta cu segun estadistica, y informacion cu ta yega for di Hulanda, ta indica cu tur studiante di Aruba, Curacao, y Bonaire cu ta bay Tera Frieu pa sigui cu nan educacion, como 23% so ta logra na Hulanda. Esey ta basa segun ultimo cifranan.
Tur e restonan ta fracasa! Y e pensamento cu ta cu e poco lesnan na Hulandes lo por tin algo di haber.
Aunke tin di pensa cu Hulanda ta dificil, e sistema ta uno cu e alumno no ta costumbra cune, pero e gran parti di e culpa ta e sistema di enseñanza na Aruba.
Esey ta e dos puntonan mas principal cu SVOA a duna Formador pa inclui den programa di Gobierno.
