Hopi turista ta keda keha di rijnan largo na Aeropuerto

ORANJESTAD (AAN): Riba Social Media por a sigui tuma nota, con turistanan ta keda keha con inespera awor tin rij largo di pasahero cu a caba di baha di avion cu tin di keda para y warda minuutnan exageradamente largo prome cu nan por sali.

   Pero mesun cos ta wordo raporta di esnan cu ta yega pa bay check-in, y drenta pa pasa door di Inmigracion local, y tambe e US Pre-Inspection di CBD Mericano.

   Tin di e turistanan cu a bisa cu Taxi a baha nan na Aeropuerto como 3 ora y mey prome cu nan vuelo, y por poco nan a perde nan avion!

   E siman ki DIARIO a tuma nota cu tin algun turista cu hasta a keda asina hopi disgusta cu e rijnan largo na Aruba, cu nan a bisa cu nan lo no ni regresa hamas bek pa e isla aki.

   Algun dia pasa, tabatin hende cu a tira culpa riba tanto Inmigracion y tambe Aduana pa e pesadiya aki.  Pero den DIARIO mes a sali un relato di nan, unda mas bien nan ta tira culpa riba e Control di Covid-19 haci door di DVG, y tambe e fayo di coordinacion di Aeropuerto.

   Tin hendenan cu ta pensa cu e momento a yega pa busca un otro lugar pa haci e control di documentonan di PCR-Negative test y documentonan di vacunacion.

   Pasobra e por bira peor!  E informe di Merca ta indicando cu mas y mas hende ta tumando avion pa porfin logra bay vakantie.  Mas vuelo nifica mas congestion na Aeropuerto pa hasta luna di Augustus cu ta na caminda.