Polis y Universidad di Auba a desaroya ‘KPA University Track’

Pa sigui inverti den e desaroyo di e agente

ORANJESTAD (AAN):  Despues di e Pre-Master exitoso aña pasa, Cuerpo Policial Aruba ta keda enfoca riba profesionalisa y fortaliza e organizacion, como tambe promove desaroyo den su personal. Pa e motibo aki KPA ta trahando estrechamente cu Universidad di Aruba y a diseña un programa academico specialmente pa polis.

  Den e programa cu ta hiba e nomber di ‘KPA University Track’ a selecta 12 polis cu lo sigui 3 materia di e bachelor Organization, Governance and Management. E curso lo tin un duracion di 1 aña y ta worde presenta pa Universidad di Aruba.

  E agentenan lo worde asigna tareanan practico cu ta pas den loke ta trata tareanan di seguridad externo y tambe tareanan di organizacion interno den KPA.

   E meta ta pa ofrece e programa anualmente pa asina construi un desaroyo di conocemento duradero den Cuerpo Policial Aruba.

   Exito na cada un di e agentenan cu a worde escohi pa forma parti di e programa academico aki.