Polis ta haci su best den trafico pero no por kibra hero cu man

Thomas Ruiz, di VRA:

• Educa y concientiza pueblo ta clave 

ORANJESTAD (AAN) Señor Thomas Ruiz, di Vereniging Rijscholen Aruba (VRA), experto den trafico, den entrevista cu DIARIO a declara, den entrevista cu DIARIO, cu VRA ta tene na cuenta cu Aruba a habri e aña aki cu tres accidente fatal caba.

   “E problema nos sa di añanan caba kico e ta. Pero mester tin boluntad pa implementa e solucionnan. Nos por keda dialoga dia aden, dia afo, bin cu yen plan, pero si no implementa nan y controla si e ta duna su fruto, manera mester ta, y si mester ahusta, ahusta nan, nos ta keda mesun leu”, señor Ruiz a señala.

   Thomas Ruiz a remarca cu e tres puntonan cardinal, cu mester traha riba dje ta: Educacion, Infrastructura y Handhaving.

  “Nos ta conciente cu nos coleganan di KPA ta haci su maximo esfuerzo, pero nos no por kibra hero cu man. Nos mester ta conciente si, cu nos falta 50% di personal eynan. Kiermen e ta un ta un sla hopi grandi. Pero tin solucion si. Por aumenta e sosten cu nan ta haya pa control di trafico. Nos a yega di duna varios ehemplo”, señor Ruiz a señala. Por ehemplo, duna e personal di BCI of e hendenan di Departamento di Transporte Publico, autoridad pa yuda controla den trafico, etc.

   “Forma teamnan cu ta concentra riba trafico. Mi a bisa caba mil y un biaha cu nos tin cu bin cu un ‘raspa ploeg’ den trafico, algo cu no ta haci wega pa bin pone orden den trafico” Thomas Ruiz a señala.

   El a agrega cu Aruba su leynan ta hopi atrasa. “Tecnologia y tur cos ta bay y nos ta keda hopi atras. Nos por cambia ley, pero nos tin cu educa e pueblo y esnan cu ta core auto, kico a cambia, con e leynan nobo ta, kico nos ta expect di bo, bin cu concientizacion cu nos no kier 50 mil auto mas riba caminda. Nos tin casi cien mil, nos por bisa. E aña aki ta di mas, y mi ta puntra mi mes na unda nos ta bay pone nan”, señor Thomas Ruiz, experto den trafico y miembro di VRA a remarca.