ORANJESTAD (AAN): Recientemente e Parlamentarionan Xiomara Maduro y tambe Shailiny Tromp-Lee, a bishita Fundacion Contra Violencia Relacional FCVR pa asina scucha mas di nan esfuersonan pa yuda victimanan di abuso.
Manera hopi fundacion, FCVR tambe tin necesidad di mas fondo pa por desaroya cu mas personal pa duna guia, cuido y dedica na prevencion.
E Parlamentarionan awor ta contento cu e necesidad di FCVR a bira conoci na un grupo grandi di Parlamentarionan. Esaki ta crea un miho conocemento y comprondemento na ora di aloca fondo publico. E urgencia di FCVR ta conoci cerca nos y pesey Fraccion di MEP a presenta un mocion pa yuda cubri e necesidad financiero.
Lamentablemente Fraccion di AVP-Futuro no a realisa e urgencia y a desaproba e 960 mil Florin cu e fundacion aki mester pa por haci nan trabao pa comunidad. E placa tey, ya cu tin un potchi di inversion cu 64 miyon Florin sin destino alguno.
Ainda Parlamento por haci cambio y aloca e fondonan publico cu ta necesario pa FCVR yuda combati un problema grandi na Aruba cu hopi biaha no ta visibel of nos no kier papia riba dje den comunidad.
