PORT-AU-PRINCE: Polis di Haiti a ricibi pruebanan cu e 16 Mericano- y Canadesnan cu a wordo secuestra door di un banda criminal, ta bibo ainda! Un fuente policial a divulga esaki.
E grupo aki forma pa misioneronan y nan famia, a wordo secuestra dia 16 di October ora cu nan tabata bin di un cas orfanato den e area pariba di Port-au-Prince controla pa un di e gruponan criminal mas peligroso na Haiti.
“Nos tin prueba cu tur e rehennan ta bibo,” ta loke un fuente di Polis Nacional a bisa prensa, pero no a duna detaye di e tipo di prueba cu nan a ricibi.
Polis a bisa cu e negociacionnan cu e secuestradornan ta den proceso y varios agente di FBI di Merca ta colaborando cu e caso.
E organizacion caritativo Christian Aid Ministries, pa kende e misioneronan ta traha, a bisa cu e rehennan ta 12 adulto di entre 18 y 48 aña di edad, y cinco mucha di entre 8 luna y cinco aña.
E banda cu ta yama su mes “400 Mawozo”, cu tin nan como rehen, ta demanda un pago di un miyon Dollar pa cada uno.
E hefe di e banda criminal Wilson Joseph a menaza di mata e rehennan, segun un video cu el a pone siman pasa riba social media.
E grabacion ta mustra Joseph rondona pa hombernan arma dilanti algun caha di morto cu supuestamente tin cinco miembro di e banda cu a wordo mata door di Polis.
“Si acaso mi no haya loke mi kier, mi lo mata e Mericanonan aki,” Joseph a bisa riba e video.
Merca ta consehando su ciudadanonan pa no viaha pa Haiti, specialmente pasobra awor nan tin e meta di secuestra Mericanonan.
E gruponan di criminal ta controla un parti grandi di Haiti, y e aña aki so nan a comete 782 secuestro a cambio di placa, segun e Centro di Analisis di Investigacion di Derechonan Humano cu tin su sede na Haiti.
