ORANJESTAD (AAN) – Minister di Husticia señor Rocco Tjon, den conferencia di prensa di gobierno, Diahuebs, a elabora, como prome punto di agenda, riba e tema di salud mental y adiccion.
Minister Tjon a bisa cu esaki ta un tema cu tin hopi atencion den pueblo y cu di parti di su ministerio tambe e ta dune hopi atencion pasobra e ta necesario.
“Nos ta bay bek na e fin di siman unda a organiza un evento sumamente positivo, ‘Let’s Art about mental health’ cu mi ta kere ta iniciativanan unda nos ta crea concientizacion, pero tambe aceptacion pa cu e tematica aki”, e dignatario a expresa.
Minister Tjon a indica cu por a mira tur departamento y instancianan hunto pa brinda informacion na pueblo, riba e tematica aki.
“Y obviamente di nos Ministerio nos tin dos persona apunta, cu semanalmente ta reuni cu tur e stakeholders cu e meta pa prome cu fin di aña, yega na un acuerdo di cooperacion cu tur e departamento y instancianan aki, pa for di e forma aki por brinda un miho cuido, pa loke ta salud mental y adiccion”, e dignatario a señala.
E mandatario a comparti algun punto specifico manera cu awe, lo firma un acuerdo entre Aruba, Corsow, Sint Maarten y Bonaire, pa loke ta un convenio di cooperacion, specificamente riba e tematica aki, unda nos lo tin Clinica Capriles representa, hunto cu Mental Health Caribbean, di Bonaire, Mental Health Foundation di Sint Maarten, y Respaldo.
“Nan lo firma un convenio di cooperacion unda cu hunto lo bay percura riba diferente topico, pa colabora mas cerca cu otro. Specificamente, riba e tereno di educacion, anto di e forma aki bo por percura, no solamente pa miho calidad pero tambe pa por percura pa amplia e ‘carrier line’ pa e personal cu ta traha den e area aki”, Minister Tjon a señala.
E otro aspecto cu nan lo traha riba dje ta calidad y desaroyo. No specificamente riba e contenido so di e materia aki, pero tambe e aspecto di bedrijfsvoering, cu ta hopi importante pasobra ora ta trata e materia aki, e gastonan ta hopi halto y si nan tur por traha hunto riba e materia aki, na final di dia e lo cumbini no solamente e profesionalnan cu ta traha den e area aki pero tambe e cuido cu por brinda na e clientenan.
“Y tambe riba proyectonan. Nos por pensa riba proyectonan E-Health, proyectonan unda ta intercambia informacion cu otro, pero na mesun momento tambe salvaguardia e parti di privacidad, cu tambe ta hopi importante”, Minister Tjon a bisa.
E ultimo punto cu e cuater paisnan y e instancianan menciona, lo colabora mas di cerca cu otro ta e parti di Ley.
“Ta asina cu tin diferente ley cu lo mester wordo adapta; leynan cu kizas mester wordo introduci pa bo lo atende miho cu e parti di salud mental y adiccion y pa e motibo ey tambe ta importante, pa hunto nos por ‘trek up’ den esaki pa trece e experticia hunto, pa por mitiga tur e retonan”, e mandatario a subraya.
