E campaña 'Lifestyle is Medicine' ta consisti di 3 fase: Pensa, Informa y Actua

ORANJESTAD (AAN): Despues cu minister di Salubridad y Turismo Dangui Oduber a lanza e campaña 'Lifestyle is Medicine', Fiderd Vis di Departamento di Salud Publico (DVG) a duna un splicacion mas amplio riba esaki.

Vis a cuminza na bisa cu durante e periodo cu tabata tin e asina yama samenscholingsverbod, DVG a nota cu e atencion tabata continuamente riba COVID-19.

“Tur informacion tabata relata na COVID-19, specialmente con pa preveni esaki y kico tur tabata e protocolnan”.

Mirando cu tur e enfoke tabata rond di Coronavirus, nos di DVG a bin cu e iniciativa pa cuminza cu un campaña pa concientiza hende riba nan salud, muy particularmente con pa nan sistema immunologico mas fuerte, segun Vis.

El a indica cu e campaña a wordo yama ‘Boost bo Defensa’ y cu e tabata consisti di 6 punto principal, esta come saludable, haci actividadnan fisico, no huma (di mas), drumi suficiente, maneha stress y practica higiena.

“E seis puntonan aki DVG ta considera puntonan pa haci cambionan den bo estilo di bida”.

Eseynan ta tambe e cambionan mas importante pa mehora bo salud y haci bo sistema inmunologico mas resiliente.

Esakinan ta e 6 basenan cu ta bay forma parti di e campaña: estilo di bida ta e mihor medicina, segun Vis.

El a splica cu despues cu e campaña di Boost bo Defensa a culmina, DVG a presenta e campaña pa e comision di malesanan contagioso no cronico y cu e comision a gusta e iniciativa y nan a presenta e iniciativa aki na PAHO.

Vis a sigui bisa cu PAHO a gusta esaki y awor a cuminza un colaboracion cu nan.

“E campaña Lifestyle is Medicine ta consisti di 3 fase, esta Pensa, Informa y Actua”.

Den e prome fase lo cuminza pone hende pensa riba e diferente aspectonan cu por tin un impacto negativo riba bo estilo di bida y consecuentemente bo salud.

Den e di dos fase lo cuminza duna informacion y tips riba cambionan di bo rutina diario, segun Vis.

El a splica cu den e fase aki lo tin un pantaya live cu expertonan aproba pa DVG, cu lo duna informacion completamente gratis.

Segun Vis, den e ultimo fase ta bay tin retonan (challenges) guia pa e expertonan, pa yuda tur esnan cu kier participa den e reto cambia nan actuacionnan, pa habitonan mas saludable.

Tur hende cu kier trece cambionan mas saludable den nan bida por subi e website cu ta www.arubasaludabel.com y nan por inscribi via e pagina web of pagina di Facebook.