Polis a inicia accion di multa contra personanan iresponsabel cu nan cacho

ORANJESTAD (AAN):  Un dia prome cu e accion policial inicia a haci un encuentro cu partnernan, stakeholders y fundacion nan pa trata e tema tocante ley di cacho.

                Den presencia di drs. Ramon Arnhem altocomisario di Polis, hefe di polis uniforma Sr. Silvio de Mey a duna un presentacion pero tambe informacion tocante e accion, proceduranan y ley.

                Den un sala completamente yen na MFA Santa Cruz a comparti e informacion importante cu e stakeholdernan pa asina nan ta na altura y ta prepara cu entrante 1 di september 2023, Cuerpo Policial Aruba lo cuminsa cu accion policial contra tur doñonan of personanan iresponsabel c unan cacho.

                Despues di dos luna di comparti informacion tocante prevencion a yega e momento pa e accion. Cacho tambe ta forma parti di nos bienestar pero e situacion di cacho ta alarmante na Aruba na unda cu tin hopi casonan cu cacho ta morde hende gravemente, cana los y cu casi ta forma un peliger pa hende su bida diariamente. E problema aki ta afectando e bienestar y ta molestiando nos comunidad

                Cuerpo Policial Aruba tey pa proteha e comunidad, coregi e comportacion pero tambe zorg pa e bienestar di e hende como tambe bestia. Ta importante pa tur hende sa cu e bienestar di e bestia ta importante y cu e bestianan no tin culpa di e molester, sino nan doñonan. Nan ta responsabel. Cuerpo Policial Aruba den e ultimo lunanan tabata bezig cu un campaña cu e tema di cacho, y nos a sa di concientiza, duna training y informa cu Cuerpo Policial lo bay actua contra e molester di cacho encuestion. 

                Ta conciente cu no tin mas aviso pero lo dirigi riba multanan contra personan iresponsabel entrante 1 di september. Mantene bo mes na nos ley y reglanan pa asina preveni cu bo ta haya un multa indesea.