Director di AZV, Edwin Jacobs:
ORANJESTAD (AAN) – Edwin Jacobs, director di SVb-AZV, cu tambe ta forma parti di e MoU cu a caba di firma hunto cu Ministerio di Salud y SETAR, cual acuerdo ta yama “Innovation Partnership” cu tin e meta di digitaliza henter e sector di cuido.
Jacobs a expresa cu aña 2023, ta mustrando di ta un aña trascendental pa e seguro di AZV. El a bisa cu un par di tempo nan tabata papia di e sostenibilidad di e fondo, y cu den algun conferencia di prensa, el a papia cu sostenibilidad di cuido conoce tres dimension, y por mira cu e aña aki AZV ta poniendo, hunto cu e ministerio, e piedranan pa e tres dimensionnan aki. “Pesey, na momento cu Minister di Salud a acerca nos cu e vision pa bay na e di ‘next level’ cu un sistema digitaliza, nos no a duda pa acepta e vision aki”, Jacobs a splica y a menciona cual ta e tres dimensionnan aki.
- Dimension financiero:
“Akinan gobierno a duna nos e tarea di werk-uit e cuadro financiero multiannual, y esey ta pa den tempo e seguro keda uno pagable y nos ta trahando duro pa garantiza e seguro di AZV pa e generacionnan mas dilanti”.
- Dimension di personal:
Percura pa tin e suficiente personal den cuido, pa keda duna esaki. “Cu esey, recientemente bao guia di e minister nos a cera e ‘zorg accord”. Eynan tin elementonan poni cu nos ta bay esforza nos mes e proximo añanan pa garantiza cu tin suficiente hende pa nos cuido”.
- Dimension Social:
“Manera boso sa e seguro di AZV ta basa riba solidaridad. Solidaridad entre esnan jong cu ta gasta menos y consumi menos cu esnan grandi cu ta consumi mas. Solidaridad entre esnan cu ta saludable cu ta consumi menos y esnan cu suerte no ta cu nan, y ta consumi mas. E solidaridad ey boso ta ripara cu cada biaha cu nos ta papia riba sostenibilidad financiero, nos ta mira cu riba medionan social tin un cuestionamento ‘mi ta paga pero mi ta uza’, ‘mi ta uza pero mi ta paga’ anto esey ta conoci cu por erosiona e solidaridad cu e sistema tin mester”, Ir. Jacobs a señala.
E ta sigui bisa cu nos ta bibando den un mundo cu ta pidi transparencia tur caminda. “Y cu e digitalizacion aki, cu e app aki cu ta bay bin, nos ta bay duna e transparencia cu nos tin mester, cu e meta tambe di fortifica e solidaridad di tur hende pa cu e seguro di AZV, pa mañan via bo app bo por wak kico bo a paga y kico bo a consumi, y bo por wak tambe kico un mayor di bo a paga y kico el a consumi. Y bo lo ripara, unda bo extra ta bay, cu no ta un extra cu ta keda na halto, pero cu ta wordo uza cu otro grupo di e comunidad. Esey ta e motibo principal importante pa nos, pa apoya e vision aki, pasobra e ta duna nos oportunidad pa fortifica e base di solidaridad di nos seguro asina importante pa comunidad, manera AZV ta”, Edwin Jacobs, a remarca.
Finalmente, Jacobs a gradici SETAR y Minister di Salud y ta keda verwacht e prome lanzamentonan.
