Poder di Hubentud a lanza su dos proyecto innovativo y a presenta su nominadonan

ORANJESTAD (AAN) – Na Cas Poder di Hubentud, ubica den Oficina di Asociacion Trabao pa Hubentud Aruba (ATHA), a tuma lugar un conferencia di prensa den cual lanza dos proyecto di Poder di Hubentud 2021, unda cada nominado (lider) a hiba palabra.

Liandro Loopstok, miembro di e Comision Poder di Hubentud 2021, a expresa palabranan di bon bini, na tur presente, entre nan mayornan y e hobennan nominado. El a menciona cu esaki ta ATHA su di 7 edicion di Poder di Hubentud, y cu orguyosamente ta bay presenta dos proyecto den cualnan e hobennan nominado a traha.

“Poder di Hubentud, edicion number 7, ta un proyecto pa cual mas of menos 30 hoben a wordo nomina pa participa den e trayecto aki. Cu Poder di Hubentud ta ofrece engrandece cada hoben, individual, riba nan liderazgo, y asina aki haci nan mas fuerte como lider den nos comunidad”, Liandro a duna di conoce.

El a sigui bisa cu tin categoria di hoben, y categoria di adulto y cada un a crea un proyecto innovativo, pa comunidad.

Seguidamente, el a pasa palabra pa Jorzinho Schilpken Croes, lider di e Proyecto di Hoben di 15 pa 17 aña. Croes ta forma parti di e Proyecto Poder di Hubentud, y el a bisa cu como hobennan nan kier aporta, pa medio di un proyecto, informacion cu por yuda e hobennan cu nan desaroyo.

“Nos proyecto ta titula ‘duna un man’ y e ta encera e tema di embarazo hubenil y salud mental. Via un debate, nos kier educa y informa nos hobennan di e escogencianan cu nan por haci pa yuda nan mes y otronan”, Jorzinho a indica.

El a agrega cu dia 17 di November aki, e debate aki lo tuma lugar. Na unda y ki horario lo wordo participa den prensa.

E lider di proyecto di hoben di adulto di 18 pa 21 aña, Nethan Romano, seguidamente a hiba palabra. Su proyecto yama “Culturarte”. Esaki ta un proyecto cultural, interactive, y innovative.

“Tur cos a cuminza ora nos a sinta na mesa y a comparti nos ideanan den e forma cu nan por organiza un actividad cultural pa hobennan. Nos como hobennan adulto nominado, ta sinti cu falta mas actividad cultural pa nos hobennan, na Aruba. Pa crea amor pa nos tradicionnan ta importante pa por conta cu actividadnan riba un base regular, pa por duna cultura e atencion y e balor cu e merece”, Nethan a subraya.

El a agrega cu pa e actividad aki lo tene cuenta cu tur e reglanan di crisis team, y e lo ta un anochi di baile, canto, declamacion di poesia, na un manera innovative. Hobennan cu ta desea di participa na e actividad aki lo ricibi un carchi di entrada, gratis.

“Nos actividad lo tuma lugar otro siman Diabierna 19 di November, na Centro di Bario Noord, di 6 or di atardi pa 9 or di anochi”, Nethan Romano a duna di conoce.

El a agrega cu porta lo habri pa 5.30 or y si tin hobennan interesa den un carchi, por acerca un di e nominadonan di Poder di Hubentud.

Finalmente, Liandro a aclarea cu e proyecto di Nethan no ta un competencia sino pa educa e hubentud di Aruba encuanto su cultura, y el a haci un invitacion na henter pueblo di Aruba pa apoya e hubentud di nos pais. “Hobennan di Aruba, corda cu den tur scuridad semper tin un luz y e luz ta abo mes, abo cu bo curazon ta briya esaki”, Liandro a conclui.