Poder di compra ta un preocupacion na Aruba

Segun Director di Camara di Comercio, Martijn Balkestein: 

ORANJESTAD (AAN): Director di Camara di Comercio y Industria di Aruba (KvK), Martijn Balkestein, a expresa preocupacion tocante e poder di compra na Aruba. Durante un rueda di prensa, el a splica e punto di bista di KvK riba e medidanan cu ta wordo considera pa drecha e situacion. 

Balkestein a bisa cu, durante un reunion di e vaste commissie di Economische Zaken y Primaire Sector di Parlamento, hunto cu otro gremionan, a sali cla cu Gobierno ta preparando un ley nobo cu e meta di mehora poder di compra. Segun e, durante e reunion no tawatin claridad den Parlamento mes tocante e contenido di e ley.

El a indica cu Gobierno ta haciendo uzo di un estudio di Economische Bureau Amsterdam, di cual a publica informacion recientemente den medio di comunicacion.

Director di KvK a enfatisa cu KvK, for di cuminsamento, ta di acuerdo cu e principio cu un persona cu ta traha fulltime mester por biba di su salario. Segun e, esaki ta un derecho y KvK ta sostene e meta aki completamente. 

Sinembargo, segun e, KvK tin diferencia di opinion riba con pa yega na e situacion actual pa hisa e poder di compra. El a remarca cu KvK no ta contento y no ta kere cu e linkmento na e bestaansminimum ta esun optimal y a indica kico ta e opinion di KvK pa soluciona esaki. 

Señor Balkestein a presenta un grafico mustrando cu salario minimo actualmente Awg.2.007,-. Un persona cu ta biba di un bestaansminimum su so, ta mas o menos Awg.2.670,-. E diferencia ta Awg.663,- cu ta un tercer parti di e salario minimo. Esaki ta toca 20.484 cupo di trabou, cu ta un 43% di e sector priva. Importante pa sa tambe, cu esaki ta toca un 55% di hende muhe cu ta traha den sector priva. Presentado e cifranan aki, Balkestein a remarca, cu nan ta resumi e debate riba e tema aki. 

Pa loke ta trata e poder di compra, Balkestein a remarca cu mester wak e situacion real si e poder di compra di berdad a deteriora e ultimo añanan. For di datanan di SvB di salarionan di diferente sector entre 2015 y 2025, ta indica cu casi tur sector en berdad a bay dilanti den e ultimo dies añanan, den un totalidad di mas o menos 10.3%. Pero a constata cu cierto sectornan a keda atras. 

Segun e, e sectornan cu a gana mas na poder di compra ta entre otro Gobierno, e empresanan di servicio publico (nutsbedrijven), y enseñansa. 

El a remarca e importancia pa revisa cu e prijsnan, inflacion a subi mas rapido cu e salario indicando cu di berdad e poder di compa a bay atras pa mayoria di hende, esta cu un 5.3%. 

“Berdad e poder di compra ta un preocupacion na Aruba. Esaki no solamente pa esnan cu ta gana salario minimo, pero pa hopi hende den nos comunidad”, Balkestein a remarca.