Kim Putters di SER Hulanda: Ta importante pa costo di bida keda pagabel pa un y tur

Na Den Haag:

ORANJESTAD (AAN): E siman aki, Prome Minister Mike Eman a reuni cu presidente di Sociaal-Economische Raad (SER) di Hulanda, Kim Putters, pa intercambia ideanan tocante e situacion socioeconomico na Aruba y Hulanda, cu atencion special pa bienestar di pueblo, poder di compra y e discusion tocante salario minimo y e bestaansminimum. Durante e encuentro, nan a papia tocante e concepto di prosperidad comparti cu ta enfoca no solamente riba crecemento economico, sino tambe riba calidad di bida y bienestar di hende. E vision aki ta relaciona cu e concepto di e bon comun, cu Prome Minister Eman ta promove como parti di su vision pa futuro di Aruba.

   Segun Putters, ta importante pa evalua si bida ta pagabel pa hende y si nan calidad di bida por keda na un bon nivel. Den e contexto aki, poder di compra ta hunga un rol importante. "Ta sumamente importante pa wak bon si costo di bida ta pagabel pa hende y si nos por mantene e calidad di bida riba nivel. Naturalmente, poder di compra ta importante den esaki", Putters a declara. Tocante e discusion riba salario minimo y bestaansminimum na Aruba, presidente di SER Hulanda a destaca cu e temanan aki ta forma parti di e retonan cu tur pais den Reino Hulandes ta enfrenta. Putters a expresa su esperanza cu na Aruba por acerca otro pa tuma bon decisionnan. Segun dje, ta importante pa ciudadanonan sinti cu gobierno ta mira nan necesidadnan, ta sostene nan y ta traha hunto cu nan pa futuro. E presidente di SER a indica cu Hulanda tambe ta enfrenta pobreza y e situacionnan den cual hende ta biba bou di bestaansminimum.  

   Segun Putters, Aruba y Hulanda por siña di otro y coopera riba tereno manera enseñansa y cuido medico, unda por mantene nan riba un bon nivel. Un economia fuerte tambe ta importante pa proteha poder di compra di pueblo. Putters a expresa satisfaccion cu e intercambio di ideanan cu Prome Minister Eman y cu e disposicion pa busca solucion concreto pa e retonan socioeconomico. Putters e siman aki tambe a reuni cu presidente y secretario di SER Aruba, cu cual e ta mantene bon contacto.

   Kim Putters lo ta na Aruba fin di november pa tene un conferencia tocante prosperidad comparti y e bon comun.