DIARIO a adverti cu Aruba mester prepara peliger
- Violencia ta sigui crece den Caribe y America Latino
- Gruponen criminal ta infiltra den grupo di refugiado
ORANJESTAD(AAN)- Hamber y miseria, provoca pa e cadena produci pa e pandemia produci pa e Coronavirus nobo, e crisis di petroleo y e guera na Ukraine, ta loke a bira desesperacion den region Caribense y Latino America.
Manera DIARIO a anuncia for di principio di e invasion di Rusia na Ukraine, e desaroyo lo tabata tin resultado serio pa un mundo cu tabata prepara pa recupera di e asalto di Covid-19.
E grupo cu lo a wordo mas afecta, ta e grupo di personanan cu ya ta biba den condicionnan social dificil y cu mester a beneficia di e plannan di Nacionnan Uni pa na 2030 alcansa un mundo cu lo a pone fin na pobresa extremo.
Awe ta pobresa ta menasa nacionnan y ta bira arma di gruponan criminal cu ta infiltra den comunidadnan na paisnan den region di Caribe y na America Latino.
Informacionnan cu a alcansa DIARIO di fuentenan internacional ta indica awor e peso total di e cadena di desaroyonan cu a culmina cu e Guera di Ukraine, ta crea desesperacion na diferente pais den Region di Caribe y tambe na America Latino.
Informantenan pa papia di situacionnan di horor cu ta presenta nan mes na paisnan manera Haiti pero tambe na diferente pais na America Latino.
“Aruba mester prepara su mes pa loke hamber extremo y desesperacion ta causa na paisnan, cu lo produci refugiadonan social cu ya ta bandonando nan pais pa busca otro destino,” informantenan a indica.
Organisacionnan oficial internacional ta na haltura di e desaroyonan cu e situacion social mundial ta crea.
Mayornan no por pone cuminda riba mesa pa nan mes y nan yiunan. Falta di cuminda ta crea mas problema di salud na hopi pais cu sigur pa e grupo social debil, no tin e cuido medico cu mester wordo duna.
Bida na diferente pais ta bira cada rato mas pisa y actonan di violencia ta bira realidad.
Na diferente pais na Latino America, ya tin organisacionnan criminal cu lo ta presenta nan mes como yudansa na refugiadonan, pero despues ta resulta di ta gruponan di teror, cu problema no solamente pa e gruponan cu ta den man pero tambe paisnan cu nan ta bay.
Pa muchanan sigur por papia di situacionnan sumamente dramatico. E cantidad di mucha cu no ta come, no por bay school, no tin ni un cama pa drumi ariba den barionan cu ta bira cada bez mas peligroso, ta sigui aumenta.
Kico Aruba por spera den e situacion aki, ta e pregunta pa cual DIARIO a busca contesta experto.
E hecho cu Prome Ministro Evelyn Wever-Croes a tene e porta entre Venezuela y Aruba cera, ta wordo considera sumamente importante.
Esaki mas ainda dor di indicacionnan cu e cantidad di grupo subversivo ta crece pero tambe union di por ehempel Venezuela cu paisnan por trece mas problema pa e region.
“Aruba por haya su mes confronta cu aumento di personanan cu ta busca refugio social na Aruba pero tambe mester keda sumamente alerto pa gruponan criminal cu ta abusa di e situacion dramatico actual,” informantenan ta indica.
“Falta di trabou, hamber y miseria absoluto ta e mihor aliado di criminalidad mientras cu na paisnan manera Haiti y Venezuela, violencia politico ta uni cu e problema actual. Comunismo tambe ta infiltra den e totalidad aki y sigur na Haiti,” informantenan ta trece dilanti.
