A adkiri ekipo di trabao completamente nobo!
ORANJESTAD (AAN) – Dialuna mainta, Minister di Husticia y Asunto Social, señor Rocco Tjon, a hiba palabra den conferencia semanal di prensa di gobierno, y el a cuminza expresando cu e ta sumamente satisfecho pa haci cierto anuncionan, pa loke ta trata Departamento di Bombero di Aruba.
Esaki ta un departamento cu a conoce hopi reto, segun e dignatario. Retonan riba diferente aspecto infrastructural, relaciona cu e materialnan cu nan mester pa por eherce nan trabao na un manera sigur pa nan mes, pero tambe nan mester trucknan y e parti di opleiding y promocion.
“Un reto grandi, pero hunto cu management team y Sindicato di Dienst Brandweer Aruba, y tambe danki na e pasenshi di e personal toch mi por bisa cu nos a logra”, Minister Rocco Tjon a bisa, y a splica di con a logra.
Na prome lugar Minister Tjon a anuncia cu Conseho di Minister a aproba e 2.2 miyon florin, cu tabata falta pa por finaliza e cuatro trucknan pa Departamento di Bombero; tambe el a bisa cu e compra pa e añanan siguiente e flota pa e departamento aki ta bon. Banda di esaki, siman pasa e trahenan pa paga candela a yega tur e bomberonan, pa di e forma aki nan por haci nan trabao na un manera sigur pa nan mes.
E dignatario, atravez di slides a mustra con e bomberonan tabata haci nan trabao, tanto e trucknan y e condicion di nan tirenan, como e paña pa uza pa combati candela, cu pa nan mes seguridad, esaki tabata un peligro.
“Den e maneho di Husticia y Asuntonan Social, den e prome parti cu nos a menciona, mi ta kere cu ta sumamente importante pa e personal cu ta eherce nan trabao haya nan hermentnan tambe pa nan por haci esaki, na un manera bon. Y mas importante cu tur, na un manera hopi sigur pa nan mes”, e dignatario a reitera.
El a reitera cu pesey tambe e trahenan pa uza ora di paga candela, a yega siman pasa y el a mustra esakinan pa medio di slides, indicando cu pa e añanan siguiente e bomberonan lo ta bon ekipa. Tambe a busca uniformnan nobo, mescos cu handschoen y helm, y otro ekiponan cu nan mester, pa asina eherce nan trabao hopi safe. Fuera di e material cu e bomberonan ta rekeri pa eherce nan labor, tambe nan posicion huridico ta bon regla. Asina Minister Rocco Tjon a expresa.
Esaki tabata un parti unda Departamento di Bombero a conoce hopi reto, e mandatario a reitera, y indica cu e ultimo lunanan hunto cu Management Team, e Sindicato y DRH, a percura pa procesa tur e promocionnan y aworaki nan ta na Gobernador pa por wordo firma, despues cu Conseho di Minister a aproba tur esaki. Aworaki, nan ta den e fase final pa tur e personal di Departamento di Bombero, cu pa hopi aña mester a warda riba nan posicion huridico y nan landsbesluit, aworaki a keda completamente regla.
