Un Gobierno cu ta paga pa tur cos, mester dicidi pa tur cos
- Asistencia social basico ta diferente na exigencia totalitario
- Cada hende tin nan propio pakete pa nan base pa felicidad
ORANJESTAD(AAN)- Kico ta e diferencia entre un Gobierno Democratico y un Gobierno Socialista?
Un Gobierno democratico ta un Gobierno cu ta percura pa tur hende tin e mes derecho den buskeda di nan felicidad y bienestar, teniendo na cuenta cu tur hende nan limite ta caba, caminda di otro ta cuminsa.
Un Gobierno democratico ta percura pa un hende nace den un comunidad, cu ta respeta y ta honra su balor y necesidad como hende.
Un Gobierno democratico ta pone e base pa un persona por desaroya su mes a base di su talentonan natural y instrumentonan cu e ta ricibi pa un desaroyo sano pa traha riba su propio futuro.
Esaki ta haci posibel cu leynan ta habri caminda pa e proteha su bon cuido como mucha, cu tin defensa di ley si su mayornan faya.
E mucha por bay school pa como adulto e dicidi con e ta bay sirbi su propio bienestar y di comunidad.
Importante ta pa e tin trabou, cu ta fuente di entrada cu democracia conoce. Economia di un pais mester produci trabou cu ta e instrumento di adelanto di hende.
Si e hende no ta capaz pa percura pa su propio base, ley ta duna asistencia. Esaki ta hiba na leynan social, cu ta duna yudansa na e personanan cu no ta capaz pa percura pa nan mes.
Leynan social ta sigura cu hende tin entrada, hasta ora malesa ta haci cu e no por traha. Leynan social ta percura pa personanan cu no por participa na e proceso laboral mas, tin un entrada basico cu ta permiti nan cubri nan gastonan basico.
Democracia ta un asunto di comunidad di hende, cu mester tin como derecho pa e keda su mes, cu su propio gusto y preferencia mientras pues esaki no ta mishi cu interes legitimo di otro.
Leynan social ta central den un comunidad democratico, cu no mester cay den e trampa di bira un comunidad den cual e ciudadano no por ta su mes mas y no por busca ni su propio bienestar mas.
Den nos sistemanan moderno di gobernacion, hopi bez tin problema pa pone e limite entre un gobierno democratico y un gobierno socialista.
Democracia no ta socialismo, cu ta un sistema den cual ta kita tur decision personal di un hende pa pone su bida den man di loke gobierno kier pa e ta of pa e tin.
Ley social no ta propio di paisnan socialista ni comunista, cu pa esencia no conoce e palabra “social”.
Socialismo y comunismo no conoce “hende” como hende. Nan conoce commune, nan conoce e totalidad di hende cu ta biba segun un grupo chikito dicidi.
For di momento cu un hende nace, tin ley ta dicidi kico lo pasa cu e hende.
Un condicion cu por wordo considera pues “verzorgingsstaat”, cu ta un comunidad caminda Gobierno ta percura pa tur hende tin loke Gobierno kier duna nan y no ta nan escogencia.
Un hende por ta feliz den un “verzorgingsstaat”, un estado den cual gobierno ta percura pa e tin cas, pa e tin trabou, pa e tin entrada, pa e tin un fiesta pa siman caminda gobierno kier pa e baila riba e musica cu gobierno ta dicidi cu ta wordo presenta?
Nos no kier papia mes di corupcion cu ta garantisa, ora Gobierno ta dicidi kico ta pasa cu cada hende.
E palabra “social” no ta nifica “socialismo”. E ta basa riba interes pa bienestar di e otro persona, cu ta completamente diferente.
Si Putin tabata social, e lo a stop guera awor. Como socialista supremo, comunista, e ta dicidi cu hende ta sigui muri y rond mundo hende ta sigui muri di hamber.
Den un mundo cu ta presenta nos berdad haciendo uzo di tanto medio di comunicacion cu ta permiti nos mes mira y tende, e concenshi humano mester alimenta su mes pa asina democracia por bira realidad na bienestar di tur hende!
