ORANJESTAD (AAN)- Carolina Thiel-Span, Director di Fundacion Autismo, ta forma parti tambe di e Plataforma Intervencion Trempan Aruba (PITA), a yama un conferencia di prensa pa informa tocante un reunion cu tabata tin cu PITA.
Thiel-Span a menciona cu e ta Beleids Medewerker di Gobierno pa e proyecto PITA, y e ta contento di a mira con e grupo a bolbe sinta hunto, y sigui traha pa un proyecto piloto di e Plataforma aki, cu e idea di haci di esaki un Plan Nacional. E dama a splica cu basicamente nan a traha plannan pa corto y largo plazo, pa nan tur tuma responsabilidad pa e proyecto aki bay dilanti, y pa e muchanan cu necesidadnan special, por haya e atencion cu nan merece, y asina nan por yega na nan potencial maximo den bida, den nos comunidad di Aruba.
“Mi ta contento di wak cu tur hende ta onboard, y cu tur hende tin interes di traha riba esaki, y sigur no ta solamente e plataforma tin cu traha duro riba dje, pero full nos comunidad. E proyectonan aki ta open pa wak con leu nos por yega como comunidad, si nos a scoge pa diversifica y tambe tin inclusion.” E ta hopi orguyoso y contento y cu otro aña nan ta trahando riba un actividad nacional grandi pa traha riba concientizacion, pa locual ta intervencion trempan y inclusion” Carolina Thiel-Span a indica.
