Setty Christiaans-Yarzagaray
ORANJESTAD (AAN): Setty Christiaans-Yarzagaray di fraccion di MEP, a mustra cu e dianan aki e topico di Reunionnan di IPKO a hala hopi atencion, y e ta haya importante pa duna un splicacion di loke e plataforma aki ta encera realmente.
El a splica cu IPKO ta un reunion inter-parlamentario, unda esnan di Aruba, Curaçao, St. Maarten, y Hulanda ta yega na un encuentro hunto caminda ta delibera riba topiconan cu adelanta ta wordo stipula, dependiendo di nan importancia, pa ser poni riba agenda.
E biaha aki como cu hopi di e islanan tin poni riba mesa pa atende e Ley di COHO, cu ta encera reforma y desaroyo, y cu Aruba ta e unico cu tin un RAFT cu ta toezicht riba e parti financiero, e momento a yega pa bin hunto, pasobra na final di dia e leynan asina no ta wordo pasa na Aruba, ni Curaçao, ni St. Maarten, pero ta wordo trata na Hulanda.
Cu e plataforma di IPKO, considerando cu Parlamento Hulandes ta consisti di 150 diferente Parlamentario, y cu ningun politico di Caribe ta forma parti di esey, y pa nan cu ta bay tuma decision e ora ta importante pa via di e plataforma aki yega na e chens pa combersa cu diferente Parlamentario, pa asina mira kico nan puntonan ta cu ta trece dilanti tocante e ley cu ta regarda tur hende cu ta COHO.
Pues e chens cu nan ta haya pa combersa cu nan, pa sa si e Parlamentarionan Hulandes y di demas islanan ta compronde e esencia di e ley, y e contenido di e ley di COHO, cual ta hopi importante. Pesey e plataforma di IPKO ta asina importante, y awor por compronde di con un delegacion asina grandi a acudi na St. Maarten pa e reunion.
E delegacion tabatin representacion di cada fraccion, y democraticamente tin di haber cu e grandura di bo fraccion den Staten. E regla ey ta poni di hopi tempo caba, y no ta awor a inventa e regla ta cuanto hende mag of no mag di bay IPKO.
