ORANJESTAD (AAN): Comerciantenan Uni Aruba (CUA)tambe tin nan opinion pa loke ta e reforma fiscal cu Gobierno di Aruba ta bay introduci y Diamars durante un conferencia di prensa na ATIA,
Francis Saladin di CUA a trece dilanti cu CUA y e otro gremionan ta completamente di acuerdo cu e reforma fiscal y ta apoya Gobierno den esaki.
“Nos ta aprecia masha di participa y nos lo kier participa mas den esaki. Nos ta di pensamento si cu sopi pura ta sali salo y pesey nos ta hopi preocupa cu e fecha di 1 di Januari 2023, mirando cu e aña ta bayendo hopi lihe", segun Saladin.
El a sigui bisa cu mirando cu e reforma fiscal ta rekeri adaptacionnan grandi di parti di e comerciantenan, Gobierno, Departamento di Impuesto y tur esnan involucra di un manera of otro, e gremionan ta hopi preocupa cu e fecha.
“Nos ta pensa cu e fecha aki mester wordo reconsidera, unda cu nos ta haya cu minimo 6 pa 9 luna despues cu Parlamento aproba esaki, bo por considera esaki como fecha di implementacion”.
Nos a wak caba cu ora di implementacion di BBO cos a bay hopi dificil y te awe ainda nos ta wak hopi hende ta struggle riba con pa raporta BBO y con pa maneha esaki, segun Saladin.
El a sigui bisa cu mirando cu BTW ta hopi mas complica, e ta imagina cu mester bin diferente training y session por ehempel di parti di por ehempel e gremionan mes hunto cu Departamento di Impuesto of Gobierno, pa asina percura cu esaki bay di un manera mas agil posibel pa loke ta e comerciantenan, pasobra no tur comerciante tin e recursonan y e sosten pa por logra esaki na un manera realmente eficiente y lihe.
“Mirando esaki nos ta boga seriamente pa e fecha di Januari 2023 wordo reconsidera y pospone esaki pa e sopi no sali sala, sino nos tin un problema hopi mas grandi”, segun Saladin.
