Francielle Lacle:
ORANJESTAD (AAN) : Francielle Lacle di e Ministerio di Naturalesa y Medio Ambiente, a hiba palabra durante e lansamento oficial di e Proyecto di Reforestacion di Aruba, un iniciativa ambicioso di Gabinete AVP-FUTURO pa planta 100 mil mata rond di e isla, den e proximo 4 aña.
"Nos ta na e momento corecto pa tuma accion. E meta ta grandi, pero nos tin fe cu, hunto cu nos comunidad y stakeholdernan, nos por logra esaki," Lacle a expresa durante e ceremonia di lansamento na Oranjestad.
E matanan lo ta planta den zona urbano y rural, incluyendo mondi, bario, scolnan y espacionan publico. E beneficionan ta hopi: pa e area urbano, mas sombra y temperatura mas fresco; pa e medio ambiente marino, menos sedimentacion riba nos coralnan; y pa e biodiversidad, un aumento den e variedad di especie y proteccion di matanan endemico y menasa.
E proyecto ta cay bou di e plan nacional pa biodiversidad cu Aruba a desaroya pa 2024–2030, yama NBSAP (National Biodiversity and Strategic Action Plan). Lacle a enfatisa cu e sorto di matanan lo inclui matanan di fruta, matanan endemico y matanan cu ta den peliger di disparce.
Ministerio di Cultura y Medio Ambiente ta ehecuta e proyecto aki hunto cu 27 organisacion local, incluyendo no solamente entidadnan ambiental manera Ban Lanta y Planta, Syntropic Farming, Ecoliving y Aruba Conservation Foundation, pero tambe negoshi, scol, sector turistico y priva. "Nos no ta haci e trabou nos so. Nos kier empodera y uni e esfuersonan cu ya ta wordo tuma," Lacle a enfatisa.
Como siguiente paso, lo forma un stuurgroep cu lo sirbi como grupo di guia, y un klankenbord dinamico, unda organisacionnan por duna input riba tema relevante, manera maneho di awa. "Esaki ta un proceso participativo, un movecion pa yega na un Aruba mas berde, mas fresco y mas fuerte," Lacle a conclui.
{gallery}Plantamento di matanan den ciudad lo inclui matanan di fruta, matanan endemico y{/gallery}
