Rulienne Arends, Trahado Preventivo:
ORANJESTAD (AAN) – Un di e campañanan mas gusta den e comunidad di Aruba, ta e Siman di Cinta Cora, miho conoci como “e siman di bisti na locura”, cu Fundacion Anti Droga Aruba tur aña ta organiza.
Den entrevista cu e Trahado Preventivo, Rulienne Arends, el a bisa cu pa 12 aña nan ta organizando e campaña aki unda cu hunto cu e campaña FADA ta para keto y bisa NO, na uzo y abuso di loke ta droga.
“Pa hopi aña nos tin e campaña aki, unda no solamente nos di FADA pero tin masha hopi hende mes, cu ta forma parti di esaki cuminzando ya caba for di edadnan super chikito, y mester bisa cu hasta babynan ta forma parti di e campaña aki. Pero nos grupo cu nos ta enfoca mas riba dje ta keda nos muchanan di scol”, Rulienne Arends a indica.
El a agrega cu aña pasa nan tabata tin mas of menos un average di dos mil potret en total, cu nan a ricibi sea riba nan pagina di facebook, of comparti cu nan di forma priva, mirando cu esaki ta un campaña cu ta riba nan pagina di facebook.
Pero tin hopi scol, hopi compania, hopi participante cu no ta forma parti di social media, pero si ta apoya e causa.
Rulienne Arends a splica cu e campaña aki ta originalmente di Merca: E “Red Ribbon Week” door di familiarnan, di ‘Kike’ (Enrique Camarena) ken tabata un ‘undercover agent’ cu a bringa pa stop uzo y abuso di traficacion di droga. “Lamentablemente, Kike a wordo gara e tempo ey y el a wordo mata. Y di e tempo ey caba, su famia a cuminza uza cinta cora, y tiki- tiki e campaña aki a bira grandi, unda cu FADA tambe, naturalmente ta haci uzo di esaki”, Rulienne a relata.
El a sigui splica cu tur aña Merca ta saca un ganador di e lema pa su participantenan. E aña aki e lema ganador ta “Life is a Movie, Film Drug Free”. Rulienne a menciona cu tur aña FADA ta cambi’e un tiki pa haci e campaña un tiki leuk. “Pesey, e siman aki, e siman di locura ta for di 28 di October te cu 1 di November, y tur dia nos lo ta haciendo algo diferente. E prome dia, 28 di October, manera ta custumber, nos lo bisti un articulo cora. E por ta un flanel, un jeans, keds cora, kico cu bo por tin cora bo ta bisti esaki pasobra bo ta bisa NO na droga. Bo ta sostene e causa di loke ta e siman di Cinta Cora”, Rulienne Arends a declara.
Den un siguiente articulo por lesa mas di e informacion aki.
