Demostrando cu e proyecto ta hopi util
- Ley aki a drenta na vigor na Maart 2024
ORANJESTAD (AAN): Manera ta conoci Ley di Plan di Mayor: (LV Voortgezet Ouderschap en Zorgvuldige Scheidingen) a bay na vigor dia 1 di maart 2024. E Ley aki ta basa riba e derecho cu un mucha tin pa worde cria door di ambos di su mayornan apesar di un separacion. Mayornan cu divorcia/separa tin e obligacion di traha un Plan di Mayor caminda nan mester stipula con nan ta bay comparti e responsabilidadnan pa cu nan yiunan. Tambe e ley ta pone enfasis riba articulo 12 di tratado internacional di derechonan di mucha, cual ta cu e mucha mester tin un bos den asuntonan cu ta regard’e.
Den cuadro di esaki Gobierno a habri Loket Plan di Mayor na MfA St Cruz, caminda mayornan y nan yiunan por haya guia y ayudo pa yega na un bon plan di mayor, plan di mucha y/of plan di hoben. Desde cu nos oficina a habri na maart di 2024, Plan di Mayor a conoce 72 caso y tur dia tin mas mayornan cu ta bin busca yudansa.
Mayornan cu ta atravesando un divorcio of separacion por acudi na Loket Plan di Mayor pa un intervencion gratis. Tin 13 familie mediators, 18 Ouderschap Blijft bemiddelaars y 38 KIES coach alinea cu Plan di Mayor pa ofrece e mayornan y e yiunan e guia necesario.
Nos tur sa cu nos hobennan por experiencia hopi stress durante e tempo dificil di separacion di nan mayornan. Na Plan di Mayor nos ta yuda e mayornan cu: (1) Promove un bon estado di animo di e hoben. (2) Promove un bon funcionamento na scol pa e hoben. (3) Promove actividadnan sano pa e hoben. (4) Promove e lazonan entre e hoben y nan mayornan. (5) Guia e mayornan den planifica e gastonan comparti pa cu e yiunan.
Nan ta haci esaki por medio di mediacion familiar y giua den diseña un bon Plan di Mayor cu atencion pa tur loke ta necesario pa promove un niñez sano pa e yiunan.
E prome stap ta pa yena un formulario di inscripcion riba nos website cu ta www.plandimayor.org, una vez cu ambos mayor yena esaki, Plan di Mayor ta invita nan pa un intake y lo recomenda cual intervencion ta pas pa nan situacion.
