Dia 1 di october 2024 ta Dia di Adulto Mayor
ORANJESTAD (AAN): Awe, diamars 1 di october 2024, Ivo Valdes, Presidente di OPPA, Organisacion di Pensionado di Aruba, cu gran placer ta haci uzo di e oportunidad aki pa duna un palabra di aprecio y cariño na nos adultonan mayor. Nos hendenan grandi cu ta e fundamento di nos comunidad, cu a pone e guia y e luz pa nos, durante e añanan di nan bida.
Di curazon nos kier bisa nan: Masha danki.
Dia di adulto mayor ta un dia special, un dia pa recorda y celebra tur e sacrificionan, esfuerzo y amor cu nan a duna nos. Nan cu a traha duro pa construi un miho futuro pa nos pais y danki na nan dedicacion, Aruba a conoce prosperidad.
Esaki ta un momento pa rindi tributo na e adultonan mayor pa nan perseverancia y resistencia. Nan ta e raisnan di nos historia. Tur desaroyo y progreso cu nos ta goza di dje, ta e resultadonan di nan trabou y dedicacion, cu ta un herencia rico cu nan a laga pa nos.
Nos comunidad mester keda uni y sigui aprecia tur loke nos grandinan a haci pa nos. Nos mester percura pa nan gosa di un miho bienestar, respeta y cuida nan, manera nan a cuida nos.
Laga e amor y respet cu nos tin pa nan, sigui crea un comunidad fuerte, unda nos hendenan grandi ta sigui forma un parti fundamental di nos comunidad.
Nos comunidad mester mustra amor y respet na nos adultonan mayor, pa di berdad trece honor na e legado cu nan a laga pa nos tur.
Masha danki di curason y pasa un feliz dia di Adulto Mayor!
Na nomber di OPPA, Organisacion di Pensionado Publico di Aruba.
