ORANJESTAD (AAN): E ultimo fecha pa por paga e prome mitad di impuesto riba plach'i auto ta 31 di Januari 2023. Kiermen otro siman diamars.
Directora di Departamento di Impuesto, Luenne Gomez- Pieters, a duna di conoce cu tur esnan cu tin un vehiculo di motor mester tene cuenta cu e impuesto ta keda mescos. E impuesto no
a cambia. DIMP ta haya hopi yamada riba si e tarifanan a cambia, si tin cambio den sticker y plach'i number. E tarifanan no a cambia.
El a bisa cu tin un plan di impuesto cu a drenta na vigor 1 di Januari 2023, pero esaki no ta afecta e tema di impuesto di vehiculo di motor, a enfatisa.
DIMP toch ta conseha pa tira un bista riba e recibo di aña pasa ya cu ta mesun suma ey mester paga e aña aki tambe. Banda di esaki tin un App cu ta disponibel caminda por yena e informacion cu e number di plachi, persoonsnummer y DIMP ta informa bek si e auto ta paga of no. Ta mira tambe den e App kico ta e suma cu mester paga, a bisa.
E aña aki no tin plach'i number nobo. Ta sigui uza e plach'i 2020. Ta den proceso pa delibera si ta bay cuminsa cu un ronda nobo di plach'i number. Pero esaki no ta e caso na 2023, Gomez-Pieters a indica.
A agrega cu tampoco tin stickers. Pa varios aña caba DIMP no ta entrega stickers. E impuesto tin cu wordo paga, e plach'i number ta wordo otorga y por controla den e sistema si un contribuyente a paga of no.
E directora di DIMP a remarca cu dia 31 di Januari ta e fecha final pa paga. For di September 2022 por a cuminsa paga pida pida e impuesto di vehiculo di motor. Pesey aworaki no tin excuus pa bisa cu no por paga.
Pa aworaki mester tin e prome mitad di anja full paga. Kiermen cu si un auto ta paga pa aña 300 florin. Pa 31 di Januari, mester tin paga 150 florin. Despues di esey, ya caba por cuminsa paga e di dos mitad adelanta si ta desea.
Por mira cu e salanan di DIMP ta yen, pero tambe tin e posibilidad pa haci pago online via online banking, a splica.
