ORANJESTAD (AAN): E siman aki, Oficina Central di Estadistica a emiti nan relato di e CPI, esta e Indice di Prijs di Consumo pa luna di December 2022.
E CPI pa luna di December 2022 ta 106.37, loke ta representa un caida
di 0.1% compara cu e indice di November 2022 (106.49).
E cambio di e CPI pa e ultimo 12 lunanan (December 2021 te cu December 2022) ta 5.7%, un subida di 2.1 punto di porcentahe (ppt) compara cu e periodo corespondiente di aña pasa (3.6%).
E promedio anual (ultimo 24 luna) di e tasa di inflacion pa e periodonan di Januari 2021 te cu December 2021 y Januari 2022 te cu December 2022 ta 5.5%, un subida di 4.8 ppt compara cu e 0.7% registra den e periodonan di Januari 2020 te cu December 2020 y Januari 2021 te cu December 2021.
Durante e luna aki, cuatro di e 12 sectornan a registra caida di prijs. E caidanan cu tabata tin e mayor efecto riba e CPI a worde registra pa e sectornan di “Transporte” (-2.2%) y “Mobilario” (-3.2%), causando un efecto di respectivamente, -0.32 y -0.29 ppt.
E caidanan den e restante sectornan a contribui cu un efecto di -0.03 ppt riba e CPI di December 2022.
E caidanan aki a worde contraresta parcialmente door di principalmente subida den e indicenan di e sector di “Recreacion y cultura” (2.2%) y “Restaurant y hotel” (2.9%) cu a contribui cu un efecto di respectivamente, 0.21 y 0.13 ppt riba e CPI di December 2022. E subidanan den e restante sectornan a contribui cu un efecto di 0.19 ppt riba e CPI di December 2022.
E caida den e sector di “Transporte” a worde causa door di principalmente un caida den e categoria “Gasto relaciona cu uso di vehiculo di transporte personal” (-3.8%), causando un efecto di -0.33 ppt. E caida den e sector di “Mobilario” a worde causa principalmente door di un caida di 9.0% den e categoria “Aparato pa uso domestico”, causando un efecto di -0.23 ppt.
E subida den e sector di “Recreacion y cultura” a worde causa principalmente door di un subida di 5.9% den e categoria “Vacacion”, causando un efecto di 0.16 ppt. E subida den e sector di “Restaurant y hotel” a worde causa principalmente door di un subida den e categoria “Cuminda pafo di cas” (1.9%), causando un efecto di 0.08 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu November 2022, 43.6% di e bienes y servicionan aki a conoce un aumento di prijs causando un efecto di 0.93 ppt, mientras cu 39.5% ta mustra un caida di prijs, cu a contribui cu un efecto di -1.04 ppt y pa e restante 16.9% no tabata tin cambio den prijs.
Prijsnan di bienes a baha cu 0.8% y a causa un efecto di -0.50 ppt. Prijsnan di servicionan a conoce un subida di 1.0% y a causa un efecto di 0.39 ppt riba CPI di December 2022.
Core inflation: E asina yama CPIC (core inflation) - CPI excluyendo e efecto di energia y cuminda - a registra na December 2022 un subida di 3.0%. E indice di energia - cu ta consisti di e productonan: electricidad, awa, gasolin y diesel a registra un subida di 14.2%. E indice di cuminda a registra un subida di 10.5%.
Bestaansminimum: E biaha aki, e bestaansminimum pa un hogar consistiendo di dos adulto y 2 mucha (edad 0-15 aña) na December 2022 ta Afl. 5,376, un subida di Afl. 469 compara cu December 2021 (Afl. 4.907).
E bestaansminimum pa un hogar di 1 adulto ta Afl. 2,560, un subida di Afl. 223 compara cu December 2021 (Afl. 2,337).
