ORANJESTAD (AAN) – Den entrevista cu DIARIO, señora Tisa LaSorte, a sigui elabora tocante e problema di e Planta di purificacion di awa di Bubali Plas, cu ta den problemanan serio.
El a bisa cu Aruba Hotel and Tourism Association (AHATA) tin hopi aña
ta manda carta pa gobierno y ta sinta cune den reunion, y tambe ta papia cu DOW y e ministerionan envolvi.
AHATA su participacion den e combersacionnan aki ta continua semper, pasobra nan kier recorda tur hende riba e urgencia pa resolve e problema.
Esaki no ta problema di un dia pero ta un problema caba cu mester di un solucion hopi lihe. Señora LaSorte a agrega cu AHATA sa cu gobierno ta trahando riba un modelo financiero pa e planta nobo.
El a subraya cu tur persona cu ta uza e sistema di riolering ta paga pe, manera ley ta stipula, y podise mester inclui Bubali Plas den e ley.
Tocante e financiamento pa drecha e camindanan na Aruba, no solamente dilanti hotelnan pero tur loke ta infrastructura ta responsabilidad di gobierno, pasobra tur hende ta paga impuesto pa gobierno haci su trabao corectamente. El a subraya cu tur hende tin e deber di paga impuesto, y gobierno tin e responsabilidad tin un presupuesto pa instancianan manera DOW, duna e servicio publico, pa cual e ta paga impuesto. Ta obligacion di gobierno pa crea un presupuesto cu tin su prioridadnan corecto.
