Embahador Dominicano cerca Minister Plenipotenciario
ORANJESTAD (AAN): Informacion di Den Haag ta indica cu e Embahador di Republica Dominicana na Hulanda, esta Juan Bautista Duran a haci un bishita oficial na Minister Plenipotenciario mr. Ady Thijsen. E motibo di e bishita ta pa embahador Bautista Duran a combersa cu Minister Thijsen riba un cumbre cu Republica Dominicano kier organiza e aña aki riba e tema di seguridad di alimento (food security) den e region di Caribe.
Tabata Minister Thijsen cu durante e recepcion na ocacion di e Dia Nacional di Republica Dominicana a trece e tema aki bou atencion di embahador Bautista Duran durante un combersacion breve cu e mandatario tabata tin cu e embahador.
Den bista cu e tema aki ta sumamente importante pa e region Caribense, embahador Bautista Duran a bisa cu proximamente elo biaha pa Republica Dominicana y lo papia e tema aki cu e Minister di Asuntonan Exterior y despues e por informa Minister Thijsen e decision di Gobierno di Republica Dominicana tocante e initiativa aki.
E cumbre mester traha pa yega na un forsa regional cu participacion di e islanan Caribense y Surnam. Banda di alimentacion, tambe lo toca e tema di awa potable, cu ta un problema regional door di contaminacion y escasez. Den esaki Aruba por hunga un rol importante, segun embahador Bautista Duran, mirando e experencia cu e isla tin den e proceso di destila awa di laman den awa potable.
E embahador a bisa cu e decision pa busca acercamento cu Surnam ta e motibo cu Surnam ta un pais grandi y tin hopi potencia pa produci fruta y berdura. Otro aspecto importante cu e cumbre lo mester atende, ta e situacion logistico entre e islanan Caribense cu ta cardinal pa distribui e productonan.
Embahador Bautista Duran a bisa cu mas tempran e cumbre aki por worde teni ta na final di juli of na November di e aña aki. Por ultimo embahador Bautista Duran a gradici Minister Thijsen pa su vision pa e desaroyo, cooperacion y bienestar di e region Caribense. E potret ta cortesia di Arubahuis.
