Dos asunto serio e huicio di Benny Sevinger a expone na salida
- Con Husticia por funciona si tur hende aplica secrecia di trabou?
- Benny lo no a haya placa pa tereno pero pa core campaña politico
ORANJESTAD(AAN)- Uno di e resultadonan directo di un caso penal den Corte ta, cu asuntonan cu generalmente no por ni wordo publica sin core un riesgo di wordo persigui pa difamacion, den sala di Corte ta bira topico.
Dos asunto cu pa hopi tempo ta wordo discuti den hopi circulo, ta “secreto di trabou” y placa cu ta duna politiconan pa nan core campaña.
Den e caso Avestruz, ora a papia di interogacion di abogadonan como testigo, “secreto di trabou” a bini dilanti. E abogado por revela loke su cliente a bisa su persona den confiansa pa e por representa e interes di su cliente of pa e yuda e cliente defende su caso?
Dos abogado ta bay wordo interoga como testigo y tur hende ta curioso kico esaki lo duna como resultado den e caso di Husticia contra Benny Sevinger.
Pero ta keda un pregunta grandi atras. Kico ta pasa si tur profesion cu por uza “secreto di trabou” dicidi cu nan no ta duna informacion dilanti Huez?
Nos mester cuminsa den nos propio seno pasobra periodista tambe tin derecho di bisa Huez cu nan no ta divulga nan informante den cuadro di “libertad di prensa”.
Ora atende cu mundo medico, e dokter tin derecho di bisa cu e ta aplica su “derecho di silencio” pasobra e ta dokter cu conoce e secretonan medico di su cliente.
Un religioso ta basa su mes riba su asistencia religioso na un persona y asina por sigui.
Con Husticia por ta husto si tur fuente cu por trece argumentonan cu ta yuda yega na un veredicto huzgo, dicidi cu nan mester mantene silencio?
Un asunto cu mester cuminsa atende hasta den nos propio seno di periodismo, cu di otro banda tin un deber di vigila bienestar di comunidad.
DIARIO den su historia a duna prueba con periodismo hasta ta yuda aclarea delito y preveni explosion contra bienestar di e pais, manteniendo su mes na silencio riba su fuente.
Clasico tabata e caso den cual DIARIO hopi tempo pasa, a bira mediador entre Polis y un grupo cu a expone un crimen y asina a habri caminda pa soluciona un caso, haci husticia sin cu e personanan inocente cu a duna nan informacion, a bira victima di acusadonan poderoso.
Pues tin forma pa atende cu “secreto di trabou” pero mester discuti con ta atende cu esaki.
Otro problema serio cu mester di solucion ta e asunto cu placa ta wordo entrega na partidonan politico pa nan core campaña.
For di nacemento di pais Aruba ta topa cu e topico aki den e caso di e proyecto di hotel Beta, den cual un grupo lo a reclama cierto derechonan a base di yudansa financiero pa e partido, cu e prome Gobierno di Aruba dirigi pa Henny Eman lo a ricibi.
Den e caso di Benny Sevinger ta topa cu e acusado Harms ta papia di un suma basta importante cu Benny Sevinger lo a ricibi pa core campaña.
Sin acusa ningun hende di nada, si nos mester puntra kico e diferencia ta entre donacion pa partido den eleccion y placa pa un politico.
E placa pa un partido den eleccion, den tur caso, ta sirbi pa e partido tin placa pa e crece loke ta haci cu e partido cu priminti mas, tin mas chens pa haya mas. Ademas, mas poderoso e partido ta, mas chens e tin pa gana eleccion.
Den e caso Avestruz e forma cu por interpreta asistencia financiero pa gastonan pa bay eleccion, sigur lo ta un punto di atencion interesante teniendo cuenta cu e acusacion di corupcion.
