Abogado Vito Carlo:
ORANJESTAD (AAN): Un di e abogadonan cu ta representa un di sospechonan den e famoso Caso Avestruz, mr. Vito Carlo, a duna un declaracion na prensa na salida di Corte diaranson mainta.
Carlo a duna di conoce c'un di su clientenan, door cu e caso ta basta complica, a busca un specialista (un professor) riba e ramo di loke e ta wordo sospecha.
Na dos ocasion, Hof a nenga ya cu solamente e abogadonan cu ta registra na Hof por bringa un caso na Corte den e region. Si ta bin un abogado Hulandes, e mester pidi 'toesteming' na Hof pa e por para na banda di e abogado local, Vito Carlo a indica.
Dos biaha Hof a nenga bisando cu e caso no ta complica indicando cu Vito mes por haci'e y dicon no a bay un hues na Corsow, locual a wordo haci.
A bisa cu e cliente, cual e no a identifica, a haya confiansa den un specialista riba e ramo di loke e ta wordo sospecha a wordo nenga.
Diamars, a agrega, a pidi formalidad pa laga e, pasobra e abogado ey ta esun cu ta prepara tur cos y e no a wordo honra.
Carlo ta haya esaki straño ya cu tin hues special busca na Hulanda, tambe fiscalnan y hasta Landsrecherche y polisnan busca di Hulanda. Hasta tabata tin un sinta den sala, a remarca. Mientrastanto, e arubianonan no mag busca un abogado di Hulanda.
Abogado Carlo a agrega cu e no ta haya husto cu un sospechoso den un caso asina grandi ta wordo kita su derecho di tin un abogado cu e kier pa defend'e.
El a laga sa cu awor su cliente ta den e proceso di entrega un keho pa reclama su derechonan fundamental como sospechoso cu ta wordo trapa.
