Parlamentario Marco Berlis (MEP):
ORANJESTAD (AAN): Pa un pais ta fuerte nos famianan mester ta fuerte y sano. E bienestar di nos famia mester ta e prioridad di cada hogar. Ta pesey e ta asina importante pa nos por conoce e factornan y e diseño con pa edifica un famia sano.
Ora nos ta papia di un famia fuerte y sano, nos ta papiando di un famia unda cu e practicanan di balornan ta un prioridad. Balornan cu ta inculca respet, amor, confiansa y ta crea un hogar ideal. Esaki sigur ta un reto awendia unda cu balornan, principionan y tradicion no ta un prioridad mas pa hopi hende.
Muchanan ora nan ta chikito ta gusta copia y sigui ehempel di e mayornan y di e rumannan mas grandi. Ta pa e motibo aki e ta di vital importancia pa compronde cu mayornan semper mester modela y duna e ehempel corecto na nan yiunan den tur momento.
E ehempel cu mayornan ta duna, ta e estilo di bida cu nos ta cosecha mas dilanti den nos yiunan. Como mayornan nos mester ta consciente di e factor aki, pa uza nos ehempel pa influencia, guia, siña, educa y stimula nos yiunan den un caminda corecto y cu principionan fuerte. No tin nada mas efectivo cu mayornan cu ta un modelo excelente den nan hogar, den nan relacion, e trato pa cu otro, e amor cu nan ta demostra na nan yiunan y na otro como pareha.
Duna nos yiunan un bon ehempel con pa traha eficientemente cu finanzas, stimula bon relacionnan cu amistadnan y famia, y con pa ta un bon bisiña. Mayornan cu ta demostra un caracter cu un moralidad halto ta stimula fieldad y integridad den relacionnan di pareha, pa nan yiu den futuro.
Un otro factor importante cu ta fortalece famianan ta ora cu e mayornan sa di demostra y modela hopi amor den famia. Como mayornan semper demostra cu boso ta stima otro y tambe boso yiunan.
E simpel bista cu e mayornan ta trata otro cu respet, ta papia cu otro cu trankilidad y por rasona di un forma decente cu otro, tin un efecto ehemplar y sumamente positivo riba e yiunan y e atmosfera cu ta wordo crea den e hogar. Amor ta bay man den man cu respet. Sin respet no por papia di amor! Si bo ta stima bo ta respeta y no tin excepcion den esaki. Pesey, e ta imperativo pa nos lanta nos muchanan pa nan tin respet cu nan vocabulario y cu hende grandi unda cu nan bay. Pero esaki sigur ta wordo inspira, fortaleci y influencia for di den e seno di e hogar.
