Nan a drief pa 12 dia te yega Panama
COLON: E angustia cu e famianan di Jhonny Palamino Geles (di 30 aña) procedente di Cartagena, y Alejandro Torrealba Silva (di 26 aña) procedente di Venezuela a pasa aden pa diesdos dia largo yen di incertidumbre, na final a caba cu alivio inmenso pa nan.
E dos piscadornan aki cu a desaparece desde 1 di Januari 2025 den Lama Caribe, a wordo haya cu bida na costa di Panama door di un barco di carga. Nan a sobrevivi door di bebe nan mesun orina.
Nan a wordo pasa pa Forza Naval di Panama, cu a hiba nan pa un Hospital unda nan a wordo hidrata y tin nan hospitaliza pa observacion y cuido medico. Esey ta loke e mama Antonia Gales a indica. E ta mama di Jhonny Palamino.
E dos piscadornan a wordo permiti pa yama nan famia cu ta biba na Cartagena (Colombia) via un yamada. Cu hopi lagrima y alegria, e muher a gradici tur hende pa e rescate, y ta contento cu su oracionnan a wordo scucha y cu e resultado aki ta un ‘milagro grandi’, esta e hecho di a logra sobrevivi riba e lama bruto aki durante e prome siman di Januari cu tabata yena cu awacero.
Bebe mesun orina: Pa por mantene nan mes cu bida durante mas di 10 dia, nan a come alga di lama, sardin, y pisca curu. Pa garantiza nan hidratacion, bao di e rayonan fuerte di solo y e hecho cu nan no tin awa potabel, nan a bebe nan mesun orina. Asina nan a conserva nan energia y no a muri deshidrata.
Pero e hecho cu nan no tabatin suficiente cuminda y awa, por a wordo nota. Despues di mas di un siman ta wordo azota pa e clima sin por suministra nan necesidadnan basico completamente, nan a perde peso y nan cuero a wordo afecta severamente. Cada uno a perde mas di 10 kilo, cu cuero tur kima.
Lama tabata bruto: E mama a bisa cu e mes a adverti su yiu pa no subi Lama Caribe na comienso di Januari, como cu e tabata bruto. Sinembargo e necesidad pa trece cuminda riba mesa, a pone e hoben ignora e advertencianan aki y a sali rumbo pa Islas del Rosario, pa captura cabaron y kreeft pa bende nan cu turistanan riba e isla.
Riba lama nan no a djis sobrevivi e falta di cuminda, sino tambe a pasa den tres maltempo pisa di lamper cu strena, cu a sigui aleha nan mas leu for di costa.
Awo cu nan a ser rescata, Jhonny Palamino lo por mira su dos yiu muher, uno di 6 aña y otro di 9 aña, y su casa kende tin seis luna na estado, y ta biba cu nan na Isla Grande, den e zona insular di Cartagena. Alejandro Torrealba ta un migrante di Venezuela, y por regresa Isla Grande unda e ta biba, y duna trankilidad na su yiu kende ta biba na Caracas.
