Shurman Milliard di FTPH:
ORANJESTAD (AAN) Shurman Milliard di Fundacion Telefon pa Hubentud (131), a declara den entrevista cu DIARIO, cu docternan y trahadornan social ta indica cu den e temporada di Pasco y Aña Nobo, hopi hende ta den soledad y cosnan no ta canando manera nan ta desea.
“Nan ta wak nan situacion un tiki mas depresivo, un tiki mas abao door cu tur hende ta hunto cu famia den un temporada di Pasco cu ta familiar. Door di esey tambe, na 131 nos a haya diferente yamada tocante e topiconan di depresion, cu sentimento cu nan bida ta cana un caminda menos agradable, nan ta wak cu nan ta hopi mas atras cu otro persona, algo cu nos tambe kier pone hopi atencion riba dje”, Shurman Milliard a señala.
Milliard a expresa cu no ta pasobra un hende su situacion financiero mas bon of mas malo cu nan sentimento ta mas bon of mas malo tambe.
“Tin hende ta biba den un cas di cuater piso y cuater pool, anto ainda nan ta sinti nan mes depresivo, malo, nan so.
Tur ora mi ta uza e ehemplo, si bo ta den un cas grandi, anto bo ta bo so, bo ta sinti hasta mas bashi, den mas soledad, cu den un cas cu un camber . Pesey den e temporada di Pasco, atrobe nos a haya hopi yamada riba e tema aki”, Milliard a comenta.
