ORANJESTAD (AAN) – Señor Pierre Croes, ken ta maneha e Fundacion Facilidadnan Deportivo (FFD),
a gradici Bureau City Inspector, e oportunidad di a aporta trabao y placa, den un accion conhunto, pa por a logra e limpieza den e veld di Mabon.
El a comenta cu nan a huur e bakinan for di Serlimar, y esaki a wordo patrocina pa Lotto pa Deporte, y Minister Endy Croes tambe a duna su aporte. Nan a yega na e punto cu BCI a entrega FFD bek e facilidad limpi, y e fundacion ta bay cuminza cu drechamento di e tribune, e veld y e parti pariba cu ta un parke masha bunita, y lo wordo embeyece y drecha e cancha di basketball, di tal manera cu e facilidad aki por wordo uza pa henter e publico di Aruba y e bario.
Croes a haci un yamada na habitantenan pa yuda FFD cu mantencion di e lugar tambe. FFD a traha un plan di mantenimento completo, y nan tin diez facilidad aworaki cu e Fundacion ta maneha. E plan aki lo wordo entrega pronto oficialmente, pero nan a cuminza cu esaki caba.
