Ferdinand Franca ta anuncia:
ORANJESTAD (AAN) – Den un conferencia di prensa convoca pa Fundacion CCCA (Crea, Cultiva, Arte u Cultura na Aruba), cu a tuma lugar den Cas di Cultura, Ferdinand Franca a anuncia otro proyecto.
Franca a comenta cu pueblo a scucha siman pasa e proyecto di Capuchon Cora, cu e fundacion ta haciendo conhuntamente cu Cas di Cultura, y e biaha aki nan lo trece e musical cu aña pasa a wordo presenta “Planta awe cosecha mañan” cu a cosecha asina hopi exito. E musical pa e aña aki lo ta uno hopi interesante, humoristico, manera aña pasa y cu ta practicamente e mesun modelo, pero awo cu un caracteristica nobo.
“E musical aki lo yama ‘Mi ta un artista’ y e lo wordo presenta dia 2 y 4 di Juni, aki na Cas di Cultura, y e ta wordo dedica na dos persona legendario den e mundo di baile, cu ta Samantha Westera Jupa cu tin 25 aña cu su scol di baile Club di Movimiento, y nos tin tambe Sonia Geevers, dirigiendo e scol Step by Step. Pues dos persona hopi afama den e mundo di baile na Aruba, y asina nos ta dedica esaki pa honra nan persona”, Ferdinand Franca a señala.
Franca a expresa cu e musical aki, manera semper, tin e toke magico y e texto y canticanan ta original, y ta bay gruponan di baile invita manera Kits & Youth in Action, bao direccion di Deborah Boekhoudt, y Jason Wester cu ta bay bin cu ta un hoben cu aworaki ta lantando su grupo di baile, Club di Movimiento cu tambe lo bay balia y Shaindra Ashby un persona tambe hopi conoci den e mundo di baile.
Ferdinand a reitera cu e musical aki tin un toke magico, unda cu den cada acto tur espectador lo keda asombra pa locual nan lo a trece riba escenario.
