Pidi comunidad pa yuda DOW mantene e rooinan cu bon drenahe di awa y e gulidonan limpi

Francis Gomez, Director Interino di DOW:

ORANJESTAD (AAN) Señor Francis Gomez, Director Interino y Hefe di Diseño y Planning di Departamento di Obranan Publico “DOW”, den entrevista cu Matutino DIARIO, tocante mantenimento di rooinan, a splica cu nan ta haci esaki frecuente den e pasadanan di awa y gulidonan tambe.

   “Nos ta haci esaki normalmente, prome cu e temporada di horcan, y den e proceso ey ora cu mester di atencion adicional nos ta bay eynan, tambe pa haci lo necesario pa por mantene.

   “Mi mester bisa cu, hopi biaha, despues di tempo tin hopi blachi mata of lodo, y tambe ta pasa cu hendenan ta tira sushi den dje, cu tambe ta obstrui e pasada di awa y asina tambe limita e flow, e drenahe di e gulido”, señor Francis Gomez a relata.

El a agrega cu pa e motibo aki DOW ta haci su controlnan frecuente, pa mantene e sistema di e miho manera posible.

   Gomez a bisa cu un parti hopi importante tambe ta, concientiza nos comunidad den e parti di desperdicio, cu tin maneranan pa atende cu esey, y no djis e manera mas facil di tira sushi riba caminda.

   “Tambe di nos banda tin cierto cambionan chikito cu nos kier haci pa mehora e fluho di awa, y tambe pa proteha cu obhetonan no bay den dje y pa hendenan no tira sushi eynan. Pesey nos tin proyectonan pendiente pa nos bay haci, pa mehora e proceso eynan tambe”, señor Lopez a remarca.

El a menciona cu e gulido di Madiki ta esun mas conoci cu tin problemanan di awa, pero full rond di Aruba tin otronan tambe. “Tin di nan cu no sa na unda nan ta, nos no ta atende cu nan, y como nan no ta conoci, nan ta trahando na un manera bon ainda”, Gomez a indica.

   Señor Francis Gomez tin un mensahe pa e habitantenan di barionan cu ta biba cerca di unda tin gulido pa nan colabora como ciudadano.

  “E gulidonan aki ta esnan di mas afecta pasobra nan ta situa directamente den e vecindario, y e yamada pa e habitantenan ta pa nan ta e wowo y bista pafo di DOW, pa nan yuda nos. Nan por tuma contacto cu nos via telefon, y tambe online na dow.aw cu nos tin nos formulario, cu nan por haci cu por haci cierto peticionnan tambe, pa nos ta hopi mas frecuente eynan tambe. Kiermen, tur esey ta bonbini, pa yuda nos pa mantene nos infrastructura na un miho condicion”, señor Francis Gomez, director interino y hefe di diseño y Planning di DOW a señala.