Francis Saladin di Comerciantenan Uni cu mensahe pa gobierno:
ORANJESTAD (AAN) Señor Francis Saladin, miembro di Comerciantenan Uni Aruba, den entrevista cu DIARIO a reaccion riba e criticanan cu tin tocante abuso di prijs y hisamento di prijs.
Na un forma tahante el a bisa cu comerciantenan no ta pone prijs, pasobra na Aruba nada ta wordo produci, tur cos ta wordo importa. Gasolin ta pone e margen di ganashi riba prijs di gasolin na cual e ta cumpre internacionalmente.
Pero ora prijs ta subi internacionalmente, na Aruba e prijs ta subi y tambe ora e ta baha, na Aruba tambe ta baha, y asina e ta core. E consumidor y tambe e politiconan tin cu cuminza compronde esey, Saladin a remarca.
“Awo, mi ta reta tur gobierno. Bo kier baha prijs di cuminda? Elimina BBO di cuminda. Di con bo no ta elimina esaki? Nos a puntra gobierno hopi biaha pa haci esaki. Pero no! Nan a subi BBO di 3% pa 7%, pa awe e dos partidonan ta bringa cu otro, ta ken a logra surplus. Tan ken su placa di surplus ta? Di pueblo! Pues e ora ey yuda pueblo, alivia pueblo cu baha prijs di cuminda door di elimina of baha e BBO riba cuminda. 7% cumulativo ta 14%. Imagina bo, gobierno ta gana 14%, ta hopi placa”, Saladin a señala.
El a agrega cu gobierno a subi accijns riba cigaria, tabaco y alcohol. Nan ta ganando hala di placa cu esaki. Uza esey pa alivia pueblo di e costo di cuminda, segun e comerciante a expresa.
