Conoci como ‘E prison di fierno’ -- ORANJESTAD (AAN): Ya caba medionan di comunicacion na Peru no ta djis yame como ‘Joran van der Sloot’ mas.
Awor ya caba prensa Peruano ta usa e palabranan ‘E asesino Joran van der Sloot’ den nan relatonan di prensa.
Den fin di siman, e corant Diario Correo na Peru a raporta cu autoridadnan na e pais a tuma decision, pa traslada cinco preso for di e prison di Julaica pa e prison di seguridad maximo di ‘Challapalca’ cu ta situa den teritorio di Tacna.
Uno di nan ta e asesino Joran Andreas Petrus van der Sloot kende awor tin 34 aña di edad, y ta condena pa e delito di mata Stephany Flores. E ta bayendo bek pa e prison aki unda e condicionnan paden ta estilo temponan medieval di historia. Por corda cu den pasado caba Joran a bay den welga di hamber na e prison aki, debi cu e tabata keha di tabata wordo maltrata, y tambe e circunstancianan medieval.
E otro presonan ta Juan Carlos Duran More di 34 aña kende ta sintando castigo pa atraco, tambe Jean Piere Lopez Romo di 33 aña kende ta sintando castigo pa atraco, Jesus Santos Puris Arzapalo di 28 aña sintando castigo pa violacion sexual, y Luis Fernando Porras Granada di 22 aña kende ta sintando castigo pa asesinato.
Nan a wordo transporta den vehiculonan special, bao escolta di personal di Prison INPE, y tambe Polis Nacional di Peru. E prison di Challapalca ta den parti zuid di Peru, ta isola na un altura di 4.500 meter riba seronan di Andes, cerca di frontera cu Bolivia.
NAN TA PELIGROSO: Segun e corant, cada uno di e presonan aki tin un storia nan tras, pero esun mas conoci ta e hulandes Joran van der Sloot cu ta sintando castigo pa asesinato di Stephany Flores.
Ademas di esey, Joran van der Sloot ta wordo acusa na Merca tambe di fraude telefonico, y extorsion di informacion riba e paradero di Natalee Holloway, kende a desaparece na Aruba dia 30 di Mei 2005.
Bayendo bek riba su storia na Peru, for di comienzo caba e tabata e sospechoso principal di asesinato di Stephany Tatiana Flores Ramirez, kende a muri dia 30 di Mei 2010 na Lima, exactamente cinco aña despues di e desaparicion di Natalee.
Joran a wordo deteni dia 3 di Juni 2010 na Chile, y a wordo deporta e dia siguiente pa Peru. Aki el a wordo interoga y ya caba dia 7 di Juni 2010 el a confesa e crimen, y a wordo sentencia na 28 aña di prison dia 13 di Januari 2012 pa e asesinato di Stephany Flores.
Na comienzo Joran tabata encarcela den Prison Piedras Gordas. Na 2014 el a wordo traslada pa e Prison Challapalca den parti zuid di Peru debi cu a gare cu un celular ilegal.
