ORANJESTAD (AAN): Segun Milton Ponson di e grupo local di Fundacion Rainbow Warriors Core, den e eleccion di Diabierna cu a pasa, e uso di e QR codes pa autentica stemgerechtigden y verifica stemkaarten, no ta permiti pa ley,
pasobra e uso di QR code no ta permiti, pasobra e ta implica e uso di equiponan digital den e stemlokaal cu ta acopla na y ta conecta cu un computer central den hoofdstembureau na Censo.
E uso di e QR code scanning y authentication software pa stemkaarten y su obvio integracion den un sistema di software cu ta alavez tabula y totalisa votonan deposita no ta REGLA pa ley mediante adaptacion den Kiesverordening, ya cu e trayectoria pa cambio di e Kiesverordening a tuma un tempo hopi largo mes.
E grupo di Ponson ta opina cu den e Kiesverordening lo mester a specifica den un forma hopi detaya entre otro con tal sistema mester funciona, supervision di e uso di e sistema, checks and balances, y con e sistema aki ta ser incorpora den e procesonan di conteo y registro di votonan, tabulacion y totalisacion di voto cu SI ta stipula pa e Kiesverordening y muy en particular con e datonan registra via QR scanners ta pasa pa e sistema di conteo oficial di hoofdstembureau na Censo den un forma cu e datonan cu ta pasa ta controlable, verifiable, y legitimo y cu e integracion di e datonan aki ta duna un resultado final verifiable, controlable y legitimo pa loke ta resultado di eleccion.
Segun e grupo, Gobierno di Aruba y Raad van Advies a haya cu ta suficiente pa solamente adapta e provision den ley cu ta stipula kico mester aparece imprimi riba stemkaart pa permiti uso di QR code scanners neglishando y ignorando e cambionan necesario den Kiesverordening pa e actual procesonan digital y equiponan usa, cual ta encera den e uso di scanners y tabulacion y totalisacion, como "ondersteunende hardware en software voor verkiezingsprocessen" ta legalmente incorpora den e sistema usa na Censo.
Na opinion di Ponson y su grupo, pues e uso di e QR codes actualmente no ta someti na ningun regla ancra den ley pa loke ta concerni control, supervision y checks and balances requiri, cual ta crucial pa graba den un forma legitimo, verifiable y controlable datonan den procesonan electoral.
Fuera di esaki, na opinion di Ponson, nan a tuma nota di multiple violacion di articulo 65 di e Kiesverordening, cual articulo ta establece e legitimo derecho di cualkier votador y checkers en particular pa ta presente paden di e urnanan electoral, pa observa y hasta laga presidente di stemlokaal registra den procesverbaal violacionan detecta di reglamentonan pa votacion den urna electoral!
Pasobra tabata tin violacion di articulo 65 na gran cantidad di urna electoral, na unda tabata stroba presencia paden di urna di checkers y hasta a keda registra caso na unda checkers a ser nenga pa ta paden y mester a haci nan trabao para pafo, un flagrante violacion di articulo 65, y cu esey un proceso basico pa un eleccion, esta monitoreo a ser restringi.
DIARIO sinembargo a tende durante un conferencia di prensa di Conseho Electoral y di Censo, cu ley no ta menciona nada cu checkers mester ta paden di e lokaal. Ademas esaki no ta prome biaha cu checkers ta sinta/para pafo di bentana den eleccion na Aruba, principalmente desde cu lokaalnan na scol awor ta airco.
Pero toch Ponson y su grupo ta bisa, cu a consecuencia di e dos violacion constata, esta uso di un proceso ilegal, no reglamenta pa ley di QR code scanners, y violacion sistemico di articulo 65, cual ta base pa checkers por opera paden di urna electoral, nos mester considera e eleccion teni diabierna 25 juni ultimo, di acuerdo cu standard internacional pa "free, fair and transparent elections" como un eleccion no legitimo.
Ponson ta agrega, cu segun nan opinion, consecuentemente ta bira necesario pa formalmente pidi Ministerio Publico pa confisca tur stembiljet paketa y seya, correspondiendo na stembiljet cu voto valido, invalido y tur stembiljet no usa y obtene copia di tur procesverbaal y verslagen, promer cu e stembiljetnan ta ser destrui unavez resultado final di eleccion ta keda certifica, manera stipula den articulon 87 di dicho Kiesverordening.
E proceso di confisca materialnan di evidencia ta pa por haci reconteo, no segun stipula pa Kiesverordening, pero den contexto di un investigation penal, cu entre otro lo por enfoca riba "valsheid in geschrifte".
