ORANJESTAD (AAN): Manera cu DIARIO a raporta varios biaha, e compania Norwegian Cruise Line a paga pa usa Waf di Aruba unda nan tabata mara 3 di nan barconan crusero cu a keda idle durante pandemia di Coronavirus.
Na comienzo di luna di Juni, e compania a dicidi pa cuminza haci preparacion pa e barco Norwegian Joy haci preparacion pa pronto start viahenan crusero. Pesey nan a bisa Aruba ayo y danki, y e barco aki di e dia ey ta mara awor na waf di Isla Grande, na San Juan, Puerto Rico.
Na Aruba a keda atras Norwegian Gem, Norwegian Sky, y tambe Norwegian Pearl. Algun tempo pasa, Norwegian Pearl a bandona Aruba y a bay ancra na e pier na Otrabanda na Curacao.
Riba Diasabra mainta, ta e barco Norwegian Sky a bandona Aruba, y a sali pa Colon (Panama) unda el a yega Dialuna madruga. Tin indicacion cu el a bay Panama pa busca pieza of personal. Despues riba Diamars e ta sali pa bay rumbo pa waf di Cartagena (Colombia), unda e lo bay pasa den trabao di mantenimento.
Norwegian Sky ta nabegando aworaki sin pasahero, pero cu 108 tripulante abordo. Tur e tripulantenan eyriba a wordo vacuna contra Covid-19.
Gobierno Colombiano a duna autorizacion pa e crusero aki bin mara na e Waf di Cartagena pa haci trabao di mantenimento interno. E trabaonan aki lo bay dura 2 luna, y e plannan tey tambe pa cambia e tripulacion cumpliendo cu medidanan di salubridad publico di Colombia. Esaki lo wordo supervisa pa Direccion General Maritima, cu tin di check e declaracion di salud cu barco ta suministra, y tambe copia di paspoortnan, y demas detaye cu ta necesario pa Inmigracion, y esnan di Salud Publico (Dadis).
