Personal di Elmar a vries azeta den kabel pa transferi esaki pa Sub-stacion nobo

ORANJESTAD (AAN): E trabao di e Sub-stacion nobo di NV Elmar na Sabana Blanco pa acomoda coriente di 60KV ta avanzando.

   Manera ta conoci, na Aruba e compania NV Elmar tin diferente kabel di tension alto den e red di distribucion, entre otro kabel di azeta. E kabel aki ta worde uza pa transporta carga for di un Sub-stacion pa otro. E azeta den e kabel ta pa isolacion electrico y pa mantene e kabel bao di presion. Tin diferente procedimento cu tin cu cumpli cune ora di conecta un kabel di azeta cu un otro kabel.

   Segun Elmar, un di e procedimentonan aki ta ‘vriesmento di e kabel’. E principio di vriesmento riba kabelnan cu presion di azeta ta un practica cu ta worde ehecuta rond di mundo.

   Recien nan a eherce e trabao di vriesmento di kabel di 60kV na Sub-station Sabana Blanco pa por corta e kabel y realok'e di nos Sub-stacion bieu pa esun nobo. E tecniconan di Elmar cu a ehecuta e trabao di vriesmento tabata Sonny Mercera (Operator Zwaar Material) y Glenford Gray (Kabelmonteur A) di Departamento di Underground Services di Elmar.

   Congela e kabel: Prome cu por corta un kabel di azeta di 60KV, e ta esencial pa e ta gevries. E termino aki ta referi na e proceso pa baha e temperatura di e azeta den e kabel te ora e azeta vries.

   E proceso di vriesmento ta cuminsa trempan, rond 3:30’or  di marduga, pa evita e temperaturanan halto di den dia cu por afecta e calidad di e vriesmento. Pa realisa e friesmento, ta uza liquid nitrogen pa baha e temperatura di e azeta den e kabel.

   Importancia di Vriesmento: Vriesmento ta stop e suministro di azeta den e kabel, e ta un paso pa mantene e kabel den un condicion optimo pa por eherce diferente trabao riba dje, manera corta e kabel pa por realok’e of instala un “transition joint”. E motibo principal di vriesmento ta door cu e azeta no mag di sali di e kabel. Sin e vriesmento aki, e trabao ta practicamente imposibel.

   E vriesmento di kabelnan di 60kV di azeta ta un proceso esencial den e industria di distribucion di electricidad. Cu e practica di vriesmento, e compania NV Elmar por mantene e kabelnan den un condicion optimo pa eherce trabaonan vital.