ORANJESTAD (AAN): Recientemente, Minister Endy Croes a reuni cu Señora Anuesca Baly y Señora Cavril Martijn-Rombley di SKOA.
Durante e reunion a trata diferente punto di interes, entre otro, mudamento di St. Aloysius School bek pa nan edificio full remodela na Noord.
SKOA a notifica Minister Endy Croes cu a pidi dialuna y diamars ultimo liber via di Inspectie Onderwijs pa asina finalisa cu e proceso di mudamento di e scol.
Diaranson siman pasa, St. Aloysius School a cuminza cu les den nan lokaal ful renoba den nan edificio na Noord. Minister Endy Croes a indica cu pafo di e lokaalnan tin algun trabao chikito anadando despues di horario di scol y ta premira cu pa fin di October e trabao ta completamente finalisa.
Tambe, Minister Endy Croes a ricibi novedad di Scol Caiquetio unda cu Ministerio di Eneñansa y SKOA ta haciendo trabao pa “upgrade” ful e sistema di coriente, cual ta un proyecto basta grandi door cu e scol ta basta bieu. Una bes cu e proyecto aki ta cla, por instala airco na e scol.
Ademas, a trata Anglo Kleuterschool cu ta den e proceso pa renobacion di e sistema di coriente, una bes cu e parti aki ta cla ta bay over pa instala airco.
Pa loke ta trata e parti financiero, Gobierno di Aruba a traspasa esaki pa SKOA pa e proyecto por cuminsa. Por a compronde cu tin problema cu e bentanan cu mester worde cambia.
Tambe, a toca e tema di Sociaal Maatschappelijke Werksters unda cu SKOA a indica cu tin un necesidad. A trata e introduccion di alfabetisacion pa cu maneho di idioma pa augustus 2024, cual proyecto SKOA ta sostene. Un punto cu a toca tambe tabata e futuro di e edificio di Colegio Frère Bonifacius.
Fuera di tur esaki, SKOA a indica cu Prinses Maria Christina School na San Nicolas ta deteriora y no ta worde uza mas. SKOA a informa Gobierno di Aruba pa wak kico por haci eynan.
Pa conclui, Minister Endy Croes a enfatisa cu e tabata un bon reunion unda a trata diferente topico di interes na bienestar di enseñansa den su totalidad.
