ORANJESTAD (AAN) – Algun usuario di Arubus tabata testigo como dos siman pasa, di e momento cu un instancia social a yega busca e meneer cu semper a cana cargando cu bagage grandi y pisa, cu hopi hende a keda cu gana di sa kico tin den dje.
Un tempo e tabata pasa cu su ekipahe riba un bromer, cu aparentemente el a laga den un hoeki den e area di e terminal, y el a haye kibra despues, posiblemente door di vandalismo.
Tambe e persona aki tabata cana cu su stoma fura rond di dje cu un saco di tela, unda segun rumornan, e tabata carga algun cen. Aparentemente, e ta cobra bijstand y adictonan ambulante tabata horta su placa, locual tambe ta keda na rumor, pasobra DIARIO no por confirma esaki.
Locual si e testigonan a mira ta cu hende a bin buske den un auto van y nan a subi’e den dje despues cu un dama, cu pasaheronan di Arubus cu tabata tey ta kere ta un trahador social. Un poco mas laat un patruya, cu no ta parce di polis, pero mas bien di security ward a bin piki e meneer su pertenencianan.
E usuarionan di Arubus cu tabata wak’e tur dia den e terminal (Playa), ta contento cu por fin un instancia por a yude, y awo e por tin un camber limpi, su baño cu wc y ducha, y logicamente su paña y zapato pa e bisti dignamente.
DIARIO mes a publica, tambe como testigo, e dia cu un adicto a bin zundr’e, insult’e y ofend’e na un manera mahos den e terminal dilanti cantidad di turista y localnan, y hasta a lanza un menaza cu e lo kima tur su cosnan cu e ta cana cu nan.
Pues, danki Dios awo e ta conta cu seguridad personal, sigur cu alimento, y un lugar decente pa e pasa su dia dia.
Usuarionan cu a conoce mas di cerca, cu tabata sinta papia cune ta bisa cu e ta un persona hopi educa, e por papia di tur cos, y hasta ta parce cu el a studia pa abogado. Kico por a pasa? E pregunta cu hopi ta haci nan mes, sin un contesta. E no ta un adicto na droga ni un alcoholico, pero tristemente un persona abandona, un hende “sin dak riba su cabes”, kizas sin famia of cu tin famia cu pa un of otro motibo a lague pa su cuenta, locual ta hopi lamentable.
Ban spera cu e situacion a drecha p’e y cu awo e ta sinti acompaña, bon trata manera tur ser humano merece, y cu no pasa mas den e trayecto di soledad y negligencia den cual el a biba pa tempo largo.
