Rish-Ann Ammerlaan di FCVR:
ORANJESTAD (AAN) – Den entrevista cu señora Rish-Ann Ammerlaan, Trahador Social di Fundacion contra violencia relacional (FCVR), a duna di conoce cu nan a tuma nota riba medionan social, di hopi caso di maltrato y nan mes, como Fundacion, a haya entre 80 cu 90 caso di maltrato den e seis prome lunanan di e aña aki.
Ammerlaan a señala cu esaki sin conta cu e casonan cu media social ta referi, pasobra lamentablemente nan no ta pasa cerca e fundacion. Edad di e personanan cu ta pasa den violencia relacional ta varia. E ta bay entre 20 pa 60 aña di edad. El a splica cu violencia relacional ta un patronchi. E ta cuminza hopi biaha den e parti verbal-emocional, pero lamentablemente, ora cu e ta den e stage ey, hopi hende no ta reconoce e señalnan, te ora e bira fisico. Y e conocemento di hopi hende ta cu ora e bira fisico e ora ey e ta maltrato, señora Ammerlaan a indica.
El a menciona cu maltrato ta cuminza caba cu un simple joke, cu por haci e persona dolor, te cu e parti fisico.
Ammerlaan a menciona cu pa dia, cada trahador social ta trata di cuater pa cinco cliente, y esey ta nifica cu nan ta hopi druk cu nan.
Tin diferente factor cu ta crea situacion di violencia. Ora nan ta haci pregunta na e cliente, por saca afo cu e ta cuminza na e parti emocional, verbal, fisico, menaza, e aspecto financiero, etc. Ora e partner afecta kier separa su pareha no ta di acuerdo y eynan ta bin menaza, maltrato, arma, etc. “Mi a haya casonan di maltrato cu machete, cuchio, menaza, persecusion, Esaki ta sosode hopi ora cu e persona ta laga e relacion y e otro no ta contento cu esey, e ora ey e ta persigui e persona, causa menaza, entre otro, causa miedo”, señora Ammerlaan a indica.
Violencia relacional ta un patronchi. Tin hopi factor cu ta hunga un rol den esaki. “Un persona cu comete violencia, e tin hopi di haber cu su infancia, kico nan a wak na cas, con nan a lanta, kico ta e situacion, cu inconcientemente den nan relacion como adulto, nan ta ripiti e patronchi aki sin cu nan ta conciente di dje sin busca un of otro tipo ayudo. Loke el a wak na cas mayoria di bez tin influencia den kico ta scoge, na momento cu e ta un adulto”, Rish-Ann Ammerlaan a remarca.
