Periodistanan Arubiano ta reforza rol di prensa den e region durante 'Encuentro Caribeño 2025' na Puerto Rico

Organisa door di Centro de Periodismo Investigativo:

*Habriendo caminda pa colaboracion y impacto regional 

ORANJESTAD (AAN): Durante e fin di siman pasa, Aruba a forma parti den e Encuentro Caribeño de Periodistas 2025, un evento regional organisa pa Centro de Periodismo Investigativo di Puerto Rico.
            E encuentro aki ta un plataforma importante pa editor- y periodistanan Caribense, cu e meta pa fortifica e rol di prensa den un region cu ta enfrenta desafionan di gran peso.

            A conta cu participantenan di un grupo selecto di periodistanan di Puerto Rico, Mexico, Martinique, British Virgin Islands, Saint Thomas, Jamaica, Panamá, Republica Dominicana y Aruba.
            E participacion di Aruba, pa prome biaha, no solamente ta un paso positivo pa aumenta e presencia internacional, sino tambe pa duna visibilidad na e esfuerso pa eleva e nivel di periodismo cu ta wordo practica ariba e isla.

            Den e encuentro aki Aruba tabata bon representa door di editor ehecutivo di DIARIO, Yorleny Oduber, y e periodista independiente Melissa Stamper.

Un Caribe conecta

            Durante dos dia di tayer y discusion, varios tema fundamental pa e futuro di periodismo Caribense tabata ariba mesa:

- Con pa uza Inteligencia Artificial (AI) den investigacionnan periodistico.

- Con por prepara antes y despues di un desaster natural. Reglamentacion y burocracia cu ta influencia e proceso di recuperacion, plan di emergencia, base di dato di mortalidad y estadisticanan di salud.

- Hermentnan di AI pa traduci y amplifica historianan pa yega na un audiencia mas amplio.

- Tayer participativo pa desaroya fuentenan di informacion.

- Strategianan pa traha den forma colaborativo den e region Caribense.

            E temanan aki ta demostra cu e region ta den un punto crucial, y cu un periodismo fuerte y bon prepara por asumi un rol esencial den e maneho di crisis y desaroyo di e comunidad. 

Investigacionnan tocante medio ambiente y cambio climatico

            Den marco di e encuentro aki, cu tin varios aña caba cu ta wordo realisa, e periodistanan presente a haya e oportunidad di presenta propuestanan di investigacion relaciona cu temanan manera cambio climatico y medio ambiente.
            A surgi propuestanan hopi interesante cu tambe lo por bira investigacionnan den colaboracion. Pa esaki Centro de Periodismo Investigativo (CPI) lo otorga varios beca pa haci e investigacionnan aki un realidad. E becanan lo wordo anuncia den e proximo simannan. 

Un momento pa crece y reconoce e talento local

            Pa un isla chikito manera Aruba, participa den evento manera Encuentro Caribeño ta sirbi como un espacio valioso pa intercambio di conocimento y pa posiciona e talento local riba un escenario mas amplio.
            Periodista- y editornan mester tin acceso na entrenamento continuo, comparti experencianan y sostene combersacionnan cu profesionalnan cu ta enfrenta retonan similar.

            E hecho cu Aruba tabata bon representa den un evento di renombre y peso regional ta un indicacion cu e trabou periodistico aki ta wordo nota, y cu e bos arubiano ta relevante den e discurso Caribense y regional. 

Periodismo Caribense cu impacto

            Den un mundo cada bes mas conecta, Aruba no por keda atras den e lucha pa un prensa profesional y comprometi cu berdad. Participacion den encuentronan manera esaki ta crea brugnan, ta fortalece e rednan y ta inspira e profesionalnan pa sigui haci nan trabao cu pasion y integridad. Aruba por ta chikito na tamaño, pero su contribucion na un Caribe miho informa por ta grandi.