Ultimo desaroyonan den caso grandi di Ennia
ORANJESTAD (AAN): Recientemente Hof di husticia pa Aruba, Curaçao, Sint Maarten, Bonaire, Sint Eustatius y Saba a saca un comunicado relaciona cu e ultimo desaroyonan di un caso di Ennia, contra ex accionistanan, ehecutivonan y comisarionan di e compania, incluyendo H. Ansary.
Corte di prome instancia di Curaçao riba 29 di November di 2021 a duna su veredicto na fabor di Ennia den e caso aki y a dicta cu e compania mester wordo paga un suma di mas cu 1 biyon florin.
Esnan cu a perde e caso a apela decision di huez y e dossier ta consisti di miles di pagina.
Riba 13, 14 y 16 di Maart di 2023 e abogadonan di ambos banda a presenta nan caso, mientras cu Hof a discuti cu e caso cu e partidonan.
Den e veredicto duna riba 12 di September di 2023, cu ta uno di 143 pagina, Hof a dicidi cu e peticion di Ennia mester wordo honra.
Relaciona cu e asunto di S&S Ennia mester wordo otorga 117 miyon dollar, pa e asunto di ‘oil rigs’ e compania tin cu ricibi 11 miyon dollar y pa e asunto di gastonan excesivo Ennia tin cu wordo otorga 25 miyon florin.
Hof a determina tambe cu den e caso aki ta importante pa un experto independiente calcula e balor di Mullet Bay y pa algun partido ainda mester duna mas splicacion riba un cantidad di asunto.
Na dado momento riba 26 di November di 2024 a apunta Greg Becker, empleado di Colliers na Merca, como e experto independiente.
E experto e aña aki a haci un investigacion riba Mullet Bay, unda cu e partidonan tabata presente.
Den luna di April di e aña aki el a hinca su concepto di rapport den otro.
Despues cu e procesa e reaccion di e partidonan riba e rapport, e lo entrega e rapport definitivo na Hof.
Manera cu Hof ricibi e rapport definitivo riba e balor di Mullet Bay y a entrega esaki na e partidonan, e partidonan lo por reacciona por escrito riba esaki.
Hof ta calcula cu e debate por escrito por ta cla pa alrededor di luna di October/November.
Posiblemente e partidonan lo kier presenta nan puntonan oral tambe y den e caso aki lo planea un fecha pa haci esaki na corte, despues di cual e huez lo duna su veredicto final.
