Periodista pionero Django Simoons di DIARIO a fayece

E tabata fiel semper na e corant di pueblo

• Baluarte di periodismo di investigacion na Aruba
• Carera admirabel di 42 aña den prensa 

ORANJESTAD (AAN): Riba Diabierna merdia, a drenta e tristo noticia cu un di e reporteronan cu a percura pa hopi noticia di impacto den DIARIO for di su comienzo den decada di 1980, sigui pa 1990 y te awor, a bay sosega den braza di Señor.  El a nace na April 1946, y awor a fayece cu 79 aña di edad.

   Ta trata aki di Johnny K. Simoons, conoci pa tur hende na Aruba como ‘Django’.  Aunke el a nace na Corsou, gran parti di su bida el a pasa na Aruba unda el a forma su famia y haya amor pa su carera periodistico, cu a inclui sacamento di potret, laba su mesun potretnan, y alaves haci trabao investigativo y coba hopi tras di e noticia, pa haya sa tur cos.

   Esaki a bin danki cu Django no ta lubida cara di hende.  Su spectrum di amistad tabata gigantesco, y asina tambe su fuentenan tabata plama den tur skina na Aruba.

   Den DIARIO, el a fungi como un di e pilarnan cu a sostene e corant hunto cu su hefe, director Jossy Mansur (d.f.m.) y a lo largo di historia a yega di percura pa trece potretnan exclusivo cu despues a forma parti di historia tambe.

   Aunke e tabata conoci tambe pa un carera di cantamento den clubnan na Aruba, bao di e nomber di ‘Johnny Wonderful’, y tambe a maneha un cocktail lounge popular den Fergusonstraat cu yama ‘Ons Kroegje’.  Toch su pasion final a bira periodismo y ora e core riba caya e tin un wowo skerpi pa observa tur cos cu ta pasa rond.  Di e forma ey el a hasta bira un periodista pionero, miembro tambe di e prome Aruba Press Club y tabata atende tur charla cu tabata ser duna, y haci viahe cu demas periodistanan.  Django semper tabata sobresali como un periodista bon bisti, y nunca bo ta mire “slordig” riba caya.

   El a bira pa hopi periodista nobo, un sorto di mentor pa tur esnan cu tabata drenta e mundo di periodismo, y tambe fotografia.  E tabata cana hopi tambe cu Djispie Franken, y tin biaha hendenan tabata confundi e dosnan aki nan nomber.  Tabata gran amigo tambe di Victor ‘Toko’ Winklaar, y tin di corda cu prome cu el a uni cu DIARIO, e tabata labora un tempo pa Vespertino NOBO.

   Fuentenan internacional: Ora cualkier otro amigo periodista local tabatin mester di un informe policial, nan sa cu si nan ‘check cu Django’, nan por haya e confirmacion pa cierto informacion den forma rapido.  No djis localmente, sino hasta internacionalmente e tabata haya informacion veraz na un velocidad cu bo no por kere.

   Tempo cu tabatin secuestro di avion Venezolano cu a wordo desvia y a ateriza na Aruba.  For di exterior mes, Django a ricibi Telex y a yega na Toren di Control na Aeropuerto cu den su man, e lista di tur e pasaheronan cu tin abordo di e avion cu a ser desvia pa Aruba.  E dia ey autoridadnan den Toren di Control a keda asombra cu Django tin e informacion aki den su man, y cu placer el a comparti esaki cu tur hende den Toren.

   Ora cu informacion a drenta den marduga cu un avion priva a cay panort di Aruba, Django a yega Waf na Playa pasobra a tende cu un Remolcador lo ta saliendo pa yuda busca.  E tambe a logra subi eyriba como unico periodista, pa asina sali riba lama den marduga pa yuda busca.  Y e tabatin su camera cu ne.

   Tempo cu a cera Libertador Betico Croes den Huis van Bewaring na Dakota, Django a pasa man pa su telelens potente, y a haya permiso di propietario di Dakota Shopping Paradise pa e uza un trapi pa subi riba dak, y di eyriba a keda tira bista pa check si por mira Betico cana pafo den aire liber, ora ta duna presonan chens pa “lucht”.   Su pasenshi a produci gran resultado, ora cu el a logra saca potret di Betico ta zwaai man pe.  Betico for di prison a mire riba e dak di Dakota Shopping Paradise ta saca potret, y a smile y manda saludo.  E potret ey a bira un imagen cu a keda den historia di Aruba.

   Django tabata cana constant rond cu su camera, pasobra nunca bo no sa kico inespera por presenta bo dilanti.  Incluyendo un persecusion di Polis tras di atracadornan di banco.  Atracadornan di banco den nan adrenalina pa huy, no tabata core auto drechi y a bay plama den auto di Django.  Ey mes Django a haya tur su potretnan pa saca, y Polisnan a logra gara e atracadornan na mesun momento.

   Avion priva a sufri daño cu su tren di aterizahe riba pista di Aeropuerto?  Bo ta haya Django tambe ta saca potret eyriba, y despues di un rato ya ta desaparece.  Ningun hende sa con el a yega, ni tampoco con el a sali for di pista.  Pero e potretnan ta den DIARIO e siguiente mainta.

   Su amor pa famia: Esaki ta algo cu tur hende cu conoce, sa cu Django ta un ‘Homber di Famia’.  Felizmente casa cu Airies, nan a haya 3 yiu homber, y tambe tin varios nieto.  Django semper a percura pa su yiunan a haya bon educacion.   Cu su background di musica, tabata hasta pusha nietonan pa forma parti di e.o. De Trupialen pa nan educacion musical bay den bon direccion.

   Tabata haci viahe pa Curaçao pa bishita su famia, y tambe hiba su mesun famia riba vakantie pa pasa momentonan inolvidabel.  Tambe ta hopi social cu su coleganan, y cualkier rato ta cla pa saca maraca ora di canta 'Happy Birthday' pa cualkier di nan.

   Fundador di DIARIO a yega di bisa na varios ocasion, cu nan ta admira e con fiel Django ta cu e corant DIARIO, y tabata percura tur dia pa pueblo haya noticia fresco.  Esey tabata haci Django contento.

   Django Simoons!  Un periodista pionero y fiel amigo di DIARIO laborando mas di 42 aña.  Despues di un malesa breve, el a fayece Diabierna merdia.  Sosega na paz den braza di Señor.