Prome Hefe di Redaccion di DIARIO Jeannette L. (Jenny) Cratz:
*DIARIO a perde un parti di su alma di dedicacion total
*Cu palabranan di pesame na su familia, na DIARIO y Aruba
Na 1982, despues di otro estadia na Europa, mi a bolbe Curacao pa habri un corant Antiano nobo sin realiza cu lo mi no a keda pasobra Jossy Mansur a biaha pa Curacao pa haci mi e oferta pa maneha e prome matutino di Aruba, DIARIO como Hefe di Redaccion.
Na Januari 1983 mi a yega Aruba, incapaz di mira adelanta kico tabata spera na momento cu e lucha pa Status Aparte di Aruba tabata culmina y a bira logro na Conferencia di Mesa Redonda pero tambe un di e epocanan mas intenso cu periodismo por entrega periodismo..
Betico herida na veld di Winston. Corto tempo despues e anuncio pa anuncia cu Lago lo a cera su portanan cu tur resultado.
Un Hefe di Redaccion ta para na timon di un corant, cu no por hala atras na e momentonan mas serio den un tempo cu no tabata tin telefon celular ni internet cu ta manda portret aden cada rato.
E realidad di DIARIO tabata mi sosten total y mi por a conta cu Jossy Mansur y personal di DIARIO, cu tabata manera un familia, un union mas leu cu periodismo.
Nos tabata hende cu tabata sirbi hende, e Pueblo di Aruba, cu a transforma DIARIO den nan cas y asina a bira familia DIARIO.
Lazonan special a uni nos y te awe ta uni nos for di e tempo cu hasta nos miembronan di familia, tabata parti di e totalidad di DIARIO.
Den e totalidad aki sigur Django Simoons ta bini dilanti na un empresa caminda no ta titulo ni posicion tabata manda, pero e relacion entre hende, pa asina por sirbi hende, tabata central.
Lazonan humano cu te awe tempo no por a kibra, a nace den un tempo cu Aruba mester a atende cu asalto di terorista den su centro di ciudad di dia cla te preparacion pa Status Aparte pero tambe introduccion di sistemanan nobo y cambionan rapido mundial.
Mi ta corda un anochi, cu radio di Polis a anuncia un situacion peligroso na Playa y Django na careda a coy su camara pa bay saca portret.
Te awe mi no sa pakico enbez di bisa Django pa bini cu e mihor potret manera costumber, mi a duna orden pa e no bay.
Django a keda mira mi como sifuera ta fantasma el a mira. “Jenny di kico bo ta papia?” Mi mes no por a dune un contesta mientras el a bay na careda.
El a tarda pa regresa. E no tabata contesta e radio cu cual nos tabata comunica prome cu telefon celular a haci su entrada.
Un Django diferente na loke a bay, a drenta. E auto a topa cu vehiculo cu cual e sospechoso den un caso, a trata di scapa di autoridad. E impacto entre e dos vehiculonan no por a wordo preveni. Django a scapa di morto y su auto a keda destrui.
“Bo a bisa mi no bay,”el a bisa mi. Con splica mi reaccion, ta dificil, pero si e ta marca e relacion sumamente special den e familia di DIARIO, cu a nace den e cambionan estatal di Aruba, cu a bira y ta keda parti integral di nos bida.
Mi tabata tin e titulo di Hefe di Redaccion, pero esey no por mishi cu nos relacionnan humano.
DIARIO a nace den sentimentonan y lucha cu ta bay mucho mas leu cu titulo y conocemento y den cual e lazonan humano te awe ta prevalece.
Nos famianan conoce otro. Mas dificil e retonan di periodismo a bira, mas nos a uni cu otro.
Awe mi no ta despedi di cualkier persona. Mi ta despedi di Django Simoons, cu a traha hunto cu mi na DIARIO pero tabata un ruman, un amigo, hasta un poco manera un tata cu kier a proteha mi contra cualkier peliger.
Django tabata un persona cu ta inspira confianza y tabata cuadra den e totalidad di DIARIO marca pa calor humano.
Django tabata un persona cu contacto cu tur hende na Aruba, cu tabata confia nan informacionnan den su man y cu e tabata entrega na DIARIO, cu no por tabata tin duda den e calidad y validez di su informacionnan.
Un persona serio, integro pero habri pa tur hende.
Awe mi curazon ta cu mi coleganan di DIARIO, cu semper a keda parti di mi bida personal y hunto nos ta recorda nos Django, su preocupacion pa nos bienestar, su intentonan pa regla tur cos.
Awe pa despedi di Django mi mester bolbe na e momentonan special di mi bida cu mi por a sirbi Aruba como miembro no di un corant, pero di loke Jossy y Nuhad Mansur a introduci como un familia pa sirbi e bienestar di Aruba.
Danki pa bo sosten, Django. Danki pa bo asistencia. Danki pa kier a fungi como un ruman mayor preocupa pa nos bienestar como hende den luchanan cu a uni nos pa sirbi interes di Aruba! Te despues, mi amigo! Hopi forza na tur miembro di su famia, cu a bira tambe familia di e familia DIARIO!
