Dia di Prensa
ORANJESTAD (AAN): Awe dia 1 di September 2025, DIARIO tambe ta celebra Dia di Prensa Mundial.
No ta existi periodismo sin hende. Periodismo ta basa riba un sirbishi completo na e dignidad di hende. E periodista mester ta djis hende den hende. Bo no por ta sinta riba un trono for di cual bo ta dicidi kende ta hende y kende no ta hende. Tur hende tin dignidad, cu ta e pakete total cu bo mester traha pe.
Periodismo ta rekeri pa bo duna bo mes completamente pa e causa cu bo kier sirbi. E causa ey mester ta dignidad di hende, manera e aña cu a pasa a demostra.
Si bo no ta kere den dignidad di hende, bo no por lucha pa e causa di un comunidad, den cual no ta e perdida di material mester worde lamenta pero e resultado di e causa di perdida di material y perdida di tur loke pa ley mester sostene e dignidad di hende.
Dignidad di hende lamentablemente e siglo nobo aki, a worde kibra riba tur tereno. Hende a worde transforma den tur loke hende no mester ta. E situacion social a haci hende pidido di fabor na un pais cu legalmente mester percura pa tur hende por biba un bida digno como hende. E compromiso cu hopi kier cera cu esnan cu por afecta nan propio probecho, a afecta e proteccion y defensa cu dignidad di hende mester conoce.
Si e periodista bringa pa economia, pa finanza, pa desaroyo di e pais, ta bringa pa e pais por entrega ciudadanonan e dignidad cu nan tin derecho riba dje. Esey awor na 2025 ta na peligro completo rond mundo y esey mester a lucha contra dje.
Dignidad di un hende ta nifica cu como hende e tin derecho di no worde usa pa ningun proposito. Un hende mester ta un ser, cu haciendo uso di su libertad y tur loke su pais por produci, ta busca y haya su bienestar cu ta su felicidad.
Dignidad di hende ta implica cu resultadonan economico di e pais, ta base pa un maneho financiero cu ta garantiza tur hende e hermentnan pa no ta limosnero di fabornan cu ta kibra su libertad; di no mester entrega su principionan pa haya loke e tin derecho riba dje; y pa su reputacion y meritonan haya reconocimento. Un hende no por ta victima di ladronicia, di crimen, di abuso di ningun forma y periodismo mester lucha pa esey.
Ora lucha contra corupcion ta pasobra corupcion ta nifica cu tin compra y benta di principionan, di libertad, di personalidad, di moral basa riba loke ta bon y malo.
Awendia, si un ciudadano tin di biba a base “di fabor”, esey ta e malo mas grandi di un comunidad, cu mester ta goberna di tal forma, cu legalmente bo tin garantianan humano, cu no ta lagabo cu debe cu ningun hende.
Prensa tin e deber sagrado di no permiti su mes worde manipula pa ningun hende. Libertad di expresion ta exigi cu no ta plama mentira, no ta mal informa un comunidad y no ta haci abuso. Na momento cu un hende haci un declaracion na un miembro di prensa, e mester busca su validez, investiga si ta berdad y mira kico ta e proposito pa prensa por informa comunidad debidamente y no manera cierto hendenan kier pa comunidad worde informa.
Ultimo decadanan, esey tabata e reto di periodismo rond mundo y te awe e ta sigui. Cambionan grandi, cu mester worde coregi a bati na porta di varios pais, y si bo no tin curashi pa lanta para contra loke ta destrui e pais, door di destrui hende y loke ta e parti mas sagrado di hende, bo mester entrega bo posicion, cualkier cu esey por ta den un comunidad.
E siman aki comunidad mester para keto hunto cu periodismo pa evalua kico a pasa y ta pasa. Na e momentonan aki e consenshi comun, e consenshi di tur ciudadano, di tur partido, di tur organizacion, mester bati pa restauracion di loke a bay perdi: E dignidad di hende, hancra den nos leynan basico, cu a worde kibra y cu ultimo lunanan ta causa tanto dolor na Aruba.
Durante ultimo aña, periodistanan rond mundo a haya nan ta confronta persecusion inhumano cu a destrui hende; lanta para contra abuso politico di hende; defende e derecho riba cuido medico, defensa di trabao di trahador, pensioen di behez, enseñanza y cantidad di asunto cu un hende tin derecho ariba sin pidi, pero pa Ley y di acuerdo cu loke e pais ta produci pa tur hende. Tur e factornan cu nos a lucha contra, tabata mishi directamente cu e dignidad di hende, cu tin derecho riba husticia riba tur tereno.
Periodismo tin un tarea grandi pero si un dia bo a scohe pa periodismo autentico, bo mester asumi bo responsabilidad y lucha pa hende! Pues e alma di comunidad!
